AIJALON

[Dapit sa Bayeng Osa; Dapit sa Laking Osa].

1. Usa ka siyudad sa Sepela o bungtorong ubos nga kayutaan sa Palestina, sa usa ka bungtod sa H nga tumoy sa matahom nga ubos nga patag, o walog, sa Aijalon. Ang balangay nga anaa niining dapita gitawag karon nga Yalo ug kini nahimutang sa A lamang sa dalan gikan sa Jerusalem paingon sa Tel Aviv-Yafo, mga 21 km (13 mi) sa KAK sa Jerusalem.

Ang Walog sa Aijalon mao ang kinaamihanan sa ubay-ubayng mga walog nga milatas sa kabungtoran sa Sepela ug usa ka hinungdanong agianan gikan sa kapatagan daplin sa baybayon paingon sa sentro nga bukirong rehiyon. Si Josue lagmit nga haduol niini nga patag sa dihang siya nag-ampo nga ang adlaw ug ang bulan ‘mohunong’ ibabaw sa Gabaon ug ibabaw “sa ubos nga patag sa Aijalon,” sa dihang iyang gitapos ang iyang madaogong pagpakiggubat batok sa lima ka Amorihanong mga hari nga nakiggubat batok sa Gabaon. (Jos 10:12-14) Human mailog ni Josue ang Canaan, ang Aijalon gipahat ngadto sa tribo ni Dan. (Jos 19:40-42) Kini sa ulahi gihatag ngadto sa mga anak nga lalaki ni Kohat ingong usa ka Levihanong siyudad.​—Jos 21:24.

Sa sinugdan ang mga Danhanon wala makahimo sa pagpapahawa sa mga Amorihanon gikan sa Aijalon, apan mopatim-aw nga ang Epraim gikan sa A mitabang kanila ug “ang kamot sa balay ni Jose bug-at kaayo nga napugos sila [ang mga Amorihanon] sa pagbuhat sa malisod nga trabaho.” (Huk 1:​34, 35) Lagmit mao kini ang katarongan nga ang 1 Cronicas 6:69 nagtala sa Aijalon ingong gipanag-iya sa Epraim ug ilang gihatag ngadto sa mga Kohatnon. (Apan, tan-awa ang samang kahimtang sa GAT-RIMON Num. 1.) Sa ulahi, tingali human sa pagkabahin sa gingharian, kini gihisgotan ingong usa ka siyudad sa pipila ka iladong mga Benjaminhon.​—1Cr 8:13.

Didto sa Aijalon nga si Saul unang nakadaog batok sa mga Filistehanon, sa dihang ‘gipamatay sa Israel ang nangalagiw nga mga Filistehanon gikan sa Mikmas hangtod sa Aijalon.’ (1Sa 14:31) Katuigan human niana, sa dihang ang gingharian nabahin human sa kamatayon ni Haring Solomon (mga 998 W.K.P.), ang iyang anak nga lalaki ug manununod nga si Rehoboam nagpalig-on sa Aijalon ug naghimo niini nga usa sa iyang mga salipdanan batok sa A ug sa K. (2Cr 11:5-12) Halos duha ug tunga ka siglo sa ulahi, ang Aijalon nailog sa mga Filistehanon panahon sa paghari sa dili-matinumanon nga si Haring Ahaz (761-746 W.K.P.).​—2Cr 28:18.

Ang Aijalon gihisgotan sa usa sa mga Papan sa Amarna ingong Aialuna.

2. Usa ka dapit sa teritoryo sa Zabulon, diin si Maghuhukom Elon nga gikan sa maong tribo gilubong. (Huk 12:12) Ang nahimutangan niini dili matino.