AIN

[Tuboran; Tubod].

Ang pulong sa literal nagkahulogang “mata” apan pinaagig pagtandi kini gigamit aron magkahulogan ug usa ka kinaiyanhong tubod o tuboran nga gipalahi gikan sa hinimog-tawo nga atabay o tangke, nga ang naulahing tinubdan sa tubig gigamitan sa Hebreohanong mga termino nga beʼerʹ ug bohr. (Gen 49:22; Deu 8:7; tan-awa ang BIAWAN; ATABAY.) Kini kasagarang gisulat nga “En-” sa dihang gamiton nga linangkob, sama sa En-rimon, En-gedi, En-ganim.

1. Usa ka dapit nga gihisgotan ni Jehova sa dihang gilatid ang S nga utlanan sa Israel ngadto kang Moises. (Num 34:11) Ang “Ribla” nga gihisgotan niini nga teksto nga anaa “sa sidlakan sa Ain” dayag nga wala magtumong sa Ribla sa yuta sa Hamat nga nahimutang mismo sa A sa Damasco, sanglit ang Ain gihisgotan nga nalangkit sa Dagat sa Kineret (Galilea). Kini nahimutang sa A niana nga dagat, apan ang tukmang nahimutangan niini dili matino.

2. Usa sa kinahabagatang mga siyudad nga sa sinugdan gipahat ngadto sa tribo ni Juda (Jos 15:32), dayon gihatag kini ngadto sa tribo ni Simeon sa dihang ang pahat ni Simeon gikuha gikan sa dako ra kaayong teritoryo sa Juda. (Jos 19:​1, 7, 9; 1Cr 4:​24, 32) Ang Ain haduol sa siyudad sa Rimon, ug mopatim-aw nga sa dihang kini gipuy-an pag-usab human sa pagkadestiyero sa Babilonya, ang mga ngalan sa duha ka dapit giusa: En-rimon. (Neh 11:29) Tungod niini, kini kasagarang gituohan nga mao ang Khirbet Umm er-Ramamin (Horvat Remalya), nga nahimutang nga mga 15 km (9 mi) sa A sa Beer-seba.​—Tan-awa ang RIMON Num. 2.

3. Sa Josue 21:16 ang Ain gitala ingong usa sa mga siyudad nga gihatag ngadto sa mga Levihanon. Ang pagtandi niini nga teksto uban sa Josue 15:42; 19:7 ug sa 1 Cronicas 6:59 nagpakita nga ang siyudad nga gitumong dinhi gitawag sa ubang teksto nga Asan.​—Tan-awa ang ASAN.