ALABASTRO

Ang ngalan sa gamay, samag-plorera nga mga sudlanan sa pahumot nga gama sa bato nga makaplagan duol sa Alabastron, Ehipto. Ang bato, nga usa ka porma sa calcium carbonate, ginganlan usab niining ngalana. Si David nagtigom ug ‘alabastro [Heb., shaʹyish] nga mga bato nga daghan kaayo’ alang sa pagtukod sa templo ni Jehova didto sa Jerusalem.​—1Cr 29:2.

Kining karaan nga alabastro o alabastro sa “Sidlakan” lahi sa modernong alabastro, nga usa ka hydrated calcium sulfate nga daling magasgas. Ang orihinal nga alabastro sagad nga puti ug, tungod kay kini usa ka stalagmite (puting bato nga mituybo sa salog sa langob), kini usahay mopakidlapkidlap ug lainlaing mga kolor. Halos sama kini kagahi sa marmol apan dili kaayo mosinaw. Ang batong alabastro lungagan o barinahan hangtod nga kasudlan ug likido nga motimbang ug usa ka Romanhong libra (0.33 kg; 0.72 lb). (Ju 12:3) Ang sudlanang alabastro (Gr., a·laʹba·stron) sagad pormahon nga gamay ug liog mao nga katakloban pag-ayo aron dili moalisngaw ang mahalong pahumot nga isulod niini.

Kon baratohong materyales nga sama sa gypsum ang gam-ong mga sudlanan, kini tawgon usab nga alabastro tungod kay gigamit sa samang paagi. Apan, ang mga sudlanan nga ginama gikan sa tinuod nga alabastro mao ang gigamit alang sa mas mahal nga mga pahumot, sama niadtong gigamit sa pagdihog kang Jesus sa duha ka higayon​—ang una didto sa balay sa usa ka Pariseo sa Galilea (Luc 7:37) ug ang ikaduha didto sa balay ni Simon nga sanlahon sa Betania.​—Mat 26:​6, 7; Mar 14:3.