ALMENDRA

[Heb., luz (Gen 30:37); sha·qedhʹ (Gen 43:11)].

Ang almendras (Amygdalus communis) maoy usa ka kahoy nga lumad sa Palestina, Lebanon, ug sa pipila ka dapit sa Mesopotamia. Kini usa ka membro sa pamilya sa rosas ug motubo nga ihalas ug ingong tinanom nga bungahoy.

Ang Hebreohanong ngalan nga sha·qedhʹ sa literal nagkahulogang “usa nga nahigmata,” ug haom kaayo kini tungod kay ang almendras maoy usa sa kinaunahang mga kahoy nga mamulak inigkatapos sa tingtugnaw, nga sayong mamulak sa hinapos nga bahin sa Enero o sa sayong bahin sa Pebrero. Matikdi ang pagkaamgid sa mga pulong diha sa Jeremias 1:​11, 12, diin ang Hebreohanong pulong alang sa “kahoyng almendras” (sha·qedhʹ) gisundan sa ekspresyong “nagpabiling nagmata” (sho·qedhʹ). Ang kahoy modako hangtod sa 5 m (16 p) ang gitas-on ug sa dihang mamulak, mamungingi kini sa maanindot nga rosason ug usahay puti nga mga bulak nga parisparis. Sa Ecclesiastes 12:5 ang namulak nga kahoyng almendras gigamit sa paghulagway sa ubanon nga ulo sa tawong tigulang. Ang mga dahon maoy linginon ug giringgiringon ang mga kilid. Ang bunga sa almendras linginon ug porma, lingin sa usa ka tumoy ug talinis sa laing tumoy. Kinaham kaayo kini ug gilakip ni Jacob sa gasa nga iyang gipadala ngadto sa Ehipto sa pagbalik didto sa iyang mga anak. (Gen 43:11) Ang liso sa bunga kakuhaan ug maayong lana; ang 45 kg (100 lb) nga bunga magpatunghag mga 20 kg (44 lb) nga lana.

Walay duhaduha nga tungod sa madanihong katahom niini, ang mga bulak sa almendras gigamit ingong sumbanan sa paghimo sa mga kopa diha sa mga sangasanga sa tangkawan sa tabernakulo. (Ex 25:​33, 34; 37:​19, 20) Ang sungkod ni Aaron maoy sanga usab sa almendras ug milagrosong namutot sa usa lamang ka gabii, nga namungag hinog nga mga almendras nga maoy pamatuod sa pag-uyon sa Diyos kaniya ingong dinihogang hataas nga saserdote.​—Num 17:8.