AMAZIAS
[Kusgan si Jehova].
1. Usa ka Levihanon sa banay ni Merari; anak nga lalaki ni Hilkias, amahan ni Hasabias. Usa sa iyang mga kaliwat ang nakigbahin sa pagdumala sa pag-awit atubangan sa tabernakulo sa panahon ni David.—1Cr 6:31, 32, 45.
2. Hari sa Juda kinsa, niadtong 858 W.K.P., milingkod sa trono sa edad nga 25 ug nagmando sulod sa 29 ka tuig sukad sa pagpatay sa iyang amahan nga si Jehoas. Ang iyang inahan mao si Jehoadin (Jehoadan), ug ang iyang asawa mao si Jecolias. (2Ha 14:1, 2; 15:2; 2Cr 25:1; 26:3) Sa dihang ang gingharian nalig-on diha sa iyang kamot, iyang gipamatay kadtong nagbuno sa iyang amahan, apan iyang gituman ang balaod ni Moises nga dili silotan ang ilang mga anak. (2Ha 14:5, 6; Deu 24:16) Ang iyang paghari gitiman-an ug kadasig alang sa tinuod nga pagsimba apan dili sa “bug-os nga kasingkasing” ug wala mahigawas sa seryosong mga kakulangan nga nagdalag katalagman sa iyang kaugalingon ug sa nasod sa Juda. Ang rekord sa iyang pagmando naghisgot ilabina sa duha ka pagpakiggubat.—2Cr 25:2.
Si Amazias unang milampos batok sa Edom, o Seir, ginamit ang 300,000 ka kasundalohan gikan sa Juda ug Benjamin. Nagsuhol usab siya ug 100,000 ka mersenaryo gikan sa Israel, apan tungod sa tambag sa usa ka tawo sa Diyos iyang gibayran sila ug gipapauli. Gihatag ni Jehova kang Amazias ang talagsaong kadaogan didto sa Walog sa Asin, gitugotan siya sa pagpatay ug 20,000 ka kaaway ug sa pag-ilog sa Sela, nga iyang giilisan sa ngalang Jokteel. Apan, gidala ni Amazias ang mga diyos sa Seir sa iyang pagpauli ug gisimba sila, nga nagpasilaob sa kasuko ni Jehova batok kaniya: “Nganong ikaw nangita sa mga diyos sa katawhan nga wala magluwas sa ilang kaugalingong katawhan gikan sa imong kamot?” Gipasamot lamang ni Amazias ang kadaot pinaagi sa pagpahilom sa manalagna ni Jehova.—2Ha 14:7; 2Cr 25:5-16.
Ang ikaduhang pagpakiggubat ni Amazias maoy makatalagmanon sukad sa sinugdan hangtod sa kataposan. Ang 100,000 ka mersenaryo gikan sa Israel nga iyang gipapauli misulong sa mga lungsod sa Juda sa ilang pagbalik sa amihanan. Tingali kini ang nakaaghat kang Amazias nga sa kabuang hagiton si Jehoas sa malig-ong gingharian sa amihanan, nga nag-ingon: “Umari ka. Magkita kita sa nawong ug nawong.” Ang sanong ni Jehoas: Pagkabuang sa tunokong bunglayon nga makigharong sa nagbuntaog nga sedro aron pagayatakan lamang sa usa ka ihalas nga mananap! Si Amazias wala mamati; dayag nga siya miburot tungod sa iyang bag-o pa lamang nga kadaogan, ug gipiho ni Jehova ang kapildihan ni Amazias tungod sa iyang idolatriya. Ang gubat gisangka didto sa Bet-semes, ang Juda nangalagiw, si Amazias gidakop, gibuslotan ug mga 178 m (584 p) ang paril sa Jerusalem, ug gidala ang daghang bahandi sa templo ug ang daghang binihag nga gihimong pasalig balik sa Samaria.—2Ha 14:8-14; 2Cr 25:13, 17-24.
Sukad sa panahon nga si Amazias mitalikod sa pagsimba kang Jehova, usa ka panagkunsabo ang gilaraw batok kaniya nga sa kataposan nagpugos kang Amazias sa pagkalagiw ngadto sa Lakis. Didto gipatay siya sa mga nagkunsabo. Gipulihan si Amazias sa iyang 16-anyos nga anak nga lalaki nga si Azarias (Uzzias).—2Ha 14:17-21; 2Cr 25:25-28.
3. Usa ka saserdote sa pagsimba sa nating baka didto sa Bethel nga misumbong kang Jeroboam II nga si manalagnang Amos maoy usa ka mag-aalsa batok sa pamunoan. Siya mismo misulay sa paghadlok kang Amos aron mobalik sa Juda. Apan, ang manalagna mibarog nga malig-on, miingon kang Amazias nga ang iyang asawa mahimong usa ka pampam, ang iyang mga anak mapukan pinaagi sa espada, ug si Amazias mamatay sa yuta nga mahugaw.—Am 7:10-17.
4. Amahan ni Josa; sa tribo ni Simeon. Si Josa maoy usa sa mga pangulo nga lakip niadtong nagwagtang sa mga Meunim ug sa Hamitikanhong mga lalin gikan sa walog nga duol sa Gedor sa mga adlaw ni Ezequias.—1Cr 4:24, 34, 38-41.