ARKANGHEL

Kini nga termino naggikan sa duha ka Gregong mga pulong nga “arkh” (pangulo o panguna) ug “aggelos” (anghel o manulonda). Busa ang pulong “arkanghel” nagkahulogang pangulo o pangunang manulonda, nga nagpasabot nga adunay usa lamang ka arkanghel. Gani sa Kasulatan, ang “arkanghel” dili gayod makaplagan diha sa plural nga porma. Ang 1 Tesalonica 4:​16, sa paghisgot sa pagkalabaw sa arkanghel ug sa awtoridad sa iyang katungdanan, naghisgot niini maylabot sa nabanhaw nga si Ginoong Jesu-Kristo: “Ang Ginoo manaog gikan sa langit uban sa singgit sa pagsugo, uban sa tingog sa arkanghel ug uban sa trompeta sa Diyos, ug kadtong nangamatay nga nahiusa kang Kristo mouna pagbangon.” Busa, makahuloganon gayod nga ang bugtong ngalan nga direktang gilangkit sa pulong nga “arkanghel” maoy Miguel.​—Jud 9; tan-awa ang MIGUEL Num. 1.