TIGDALA SA ARMADURA

Usa ka sundalong tig-alagad nga magdala sa armadura ug mga hinagiban sa usa ka hari o sa ubang pangulo, mounong kaniya diha sa kapeligrohan, ug motuman sa iyang isugo. Ang “tigdala sa armadura” mao ang hubad sa Hebreohanong ekspresyon nga no·seʼʹ ke·limʹ, nga sa literal nagkahulogang “usa nga nagdala ug armadura o mga hinagiban.” (1Sa 14:6; itandi ang 1Sa 14:1.) Ang mga kaaway nga masamdan sa usa ka bantogang manggugubat mahimong tiwasan sa iyang tigdala sa armadura. (1Sa 14:13) Kini nga mga tig-alagad pilion taliwala sa maisog nga mga sundalo, ug ang uban dayag nga maunongon kaayo sa ilang mga komandante.​—1Sa 14:​6, 7; 31:5.

Ang grabeng nasamdan nga si Abimelek nagsugo sa iyang tig-alagad nga nagdala sa iyang mga hinagiban sa pagpatay kaniya aron dili ingnon nga “Babaye ang nakapatay kaniya.” (Huk 9:52-54) Si David nag-alagad kanhi ingong tigdala sa armadura ni Haring Saul (1Sa 16:21); samtang ang usa ka ulahing tigdala sa armadura, nga midumili sa pagpatay sa himalatyong magmamando, nagpakamatay usab sa dihang nagpakamatay si Saul. (1Sa 31:3-6) Si Jonatan ug Joab adunay mga tigdala sa armadura (1Sa 14:6-14; 2Sa 18:15; 23:37; 1Cr 11:39) ug ingon man usab ang pangunang mga manggugubat sa lainlaing mga nasod sa kakaraanan, sama sa Filistehanon nga higanteng si Goliat.​—1Sa 17:​7, 41.