BAAL-ZEPON

[Tag-iya sa Amihanan (Amihanang Utlanan)].

Usa ka dapit nga gihisgotan aron matino ang gikampohan sa mga Israelinhon didto sa Pihahirot sa wala pa sila motabok sa Pulang Dagat. (Ex 14:2; Num 33:1-7) Kay nakabiya na sa Rameses, sila unang nagkampo sa Sucot, dayon sa Etam “sa daplin sa kamingawan.” (Ex 13:20) Niining dapita, si Jehova miingon kanila nga “mamalik ug magkampo atubangan sa Pihahirot taliwala sa Migdol ug sa dagat nga malantaw sa Baal-zepon.” Dinhi niining dapita nga ang mga magkakaro, mangangabayo, ug ang kasundalohan ni Paraon nakaapas kanila.​—Ex 14:​2, 9.

Ang nahimutangan sa Baal-zepon dili matino. Dayag nga ilado kining dapita niadtong panahona. Siyempre, ang pangunang hinungdan mao ang pagtabok sa Israel sa Pulang Dagat, nga ang asoy niini nagpakita nga sila milabang sa usa ka lawom kaayo nga katubigan. Kana nga kahimtang makita lamang sa dihang makaabot hangtod sa H sa amihanang tumoy sa Gulpo sa Suez. Tungod niini, ang pipila ka eskolar nagtuo nga ang Baal-zepon mao ang kabukiran niana nga rehiyon. Ang A Hebrew and English Lexicon of the Old Testament, ni Brown, Driver, ug Briggs (1980, p. 128), nag-ingon: “duol sa Pulang Dagat sa Ehipto, ti[ngali] ang Bkd. sa ʽAtaka.” Kini nga bukid nahimutang duol sa ulohan sa Gulpo sa Suez, dili halayo sa HK sa presenteng siyudad sa Suez. Ang uban nagtuo nga kini mao ang Jebel el Galala, mga 40 km (25 mi) o kapin pa dapit sa H. Kadtong mipabor niining dapita nagtuo nga ang Migdol, nga gihisgotan uban sa Baal-zepon diha sa mga asoy, maoy usa ka bantayanang torre nga maayong pagkapuwesto diha sa Jebel (Bukid sa) ʽAtaqah.​—Tan-awa ang PAGPANGGULA; PIHAHIROT.