BARUK

[Gipanalanginan].

1. Ang eskriba nga sekretaryo ni Jeremias. Si Baruk mao ang anak nga lalaki ni Nerias ug igsoon ni Seraias, ang tagdumala sa mga lawak ni Zedekias nga nagbasa sa linukot nga basahon ni Jeremias sa daplin sa Euprates.​—Jer 32:12; 51:​59-64.

Sa ikaupat nga tuig ni Haring Jehoiakim, niadtong 625 W.K.P., gisugdan pagsulat ni Baruk diha sa usa ka linukot nga basahon ang matagnaong mensahe sa kalaglagan sa Jerusalem nga gidiktar ni Jeremias. Sa naghinapos ang tinghunlak sa misunod nga tuig, niadtong 624 W.K.P., si Baruk nagbasa sa makusog sa linukot nga basahon “diha sa mga igdulungog sa tanang katawhan” didto sa ganghaan sa balay ni Jehova. Dayon siya gipatawag aron basahon kini ngadto sa nagkatigom nga mga prinsipe, kinsa, kay napalihok sa ilang nadungog ug nahadlok sa mga sangpotanan sa dihang ang pulong makaabot sa mga igdulungog sa hari, nag-awhag kang Baruk ug Jeremias sa pagtago. Sa pagkadungog ni Jehoiakim niini nga mahukmanong pagsaway, iyang gisunog ang tagsatagsa ka piraso sa linukot nga basahon ug iyang gisugo nga dad-on sa iyang atubangan si Baruk ug Jeremias, “apan gitagoan sila ni Jehova.” Ubos sa pagdiktar ni Jeremias, si Baruk misulat ug laing linukot nga basahon sama sa una, apan nasudlan sa “daghan pang pulong” gikan sa baba ni Jehova.​—Jer 36:1-32.

Napulog-unom ka tuig sa ulahi, sa ikanapulo nga tuig ni Zedekias, pipila lamang ka bulan sa wala pa maagawi ang Jerusalem, gikuha ni Baruk ang mga sulat-kalig-onan sa kabtangan nga gipalit ni Jeremias gikan sa usa ka ig-agaw ug gibutang kini sa usa ka sudlanan nga kulonon aron mapreserbar ug matipigan.​—Jer 32:​1, 9-16.

Sa usa ka higayon sa dihang gisulat ang unang linukot nga basahon, sa dihang si Baruk nagmulo tungod kay siya naluya, si Jehova nagpasidaan kaniya: ‘Ayaw pagpadayon sa pagtinguha ug dagkong mga butang alang sa imong kaugalingon.’ Bisan pa niana, tungod sa iyang pagkamatinumanon siya gisaaran nga panalipdan ug luwason didto ‘sa tanang dapit nga iyang adtoan,’ dili lamang sa panahon sa grabeng paglikos sa Jerusalem kondili human usab niana, sa dihang ang rebelyosong katawhan nagpugos kaniya ug kang Jeremias sa pag-adto sa Ehipto uban kanila.​—Jer 45:1-5; 43:4-7.

2. Anak nga lalaki ni Zabai; si Baruk “nagtrabaho nga madasigon” sa pagtabang kang Nehemias sa pagtukod pag-usab sa mga paril sa Jerusalem. (Neh 3:20) Lagmit mao ra ang Num. 3.

3. Usa ka saserdote kansang kaliwat, kon dili man siya mismo, nagpamatuod sa “kasaligang kontrata” ni Nehemias. (Neh 9:38; 10:​1, 6, 8) Kon si Baruk mismo ang nagtimbre niini nga kasabotan, siya lagmit mao ra ang Num. 2.

4. Amahan o katigulangan ni Maaseias, kinsa nagpuyo sa Jerusalem sa panahon ni Nehemias. Usa ka kaliwat ni Juda.​—Neh 11:4-6.