Likayi ang “Pagtinguha ug Dagkong mga Butang Alang sa Imong Kaugalingon”

1, 2. (a) Unsa nga suliran ang giatubang ni Baruk sa ikaupat nga tuig ni Jehoiakim? (b) Giunsa pagtabang ni Jehova si Baruk?

SI Baruk, ang matinumanong eskriba o sekretaryo ni Jeremias, naluya. Ikaupat kadto nga tuig sa pagmando sa daotan nga si Haring Jehoiakim, o niadtong mga 625 W.K.P. Gisultihan ni Jeremias ang eskriba nga isulat sa usa ka linukot nga basahon ang tanang gipamulong ni Jehova pinaagi sa manalagna bahin sa Jerusalem ug Juda, mga pulong nga gipahayag latas sa 23 ka tuig nga pagpanagna ni Jeremias hangtod nianang panahona. (Jer. 25:1-3; 36:1, 2) Wala basaha ni Baruk ngadto sa mga Hudiyo nianang panahona ang sulod sa maong linukot. Iya kanang gibasa sa sunod pa nga tuig. (Jer. 36:9, 10) Apan may nakapaguol ba pag-ayo kang Baruk?

² “Alaot ako karon,” mituaw si Baruk, “kay si Jehova nagdugang ug kaguol sa akong kasakit! Ako naluya tungod sa akong pagpanghupaw.” Tingali may higayon nga tungod sa imong kaluya ikaw usab manghupaw sa tago o kaha madungog sa uban. Bisan hain man niini ang gihimo ni Baruk, si Jehova nagpatalinghog kaniya. Ang Tigsusi sa kasingkasing sa tawo nahibalo kon unsay nakapaguol kang Baruk, ug pinaagi ni Jeremias siya malulotong gitul-id sa Diyos. (Basaha ang Jeremias 45:1-5.) Apan, tingali ikaw maghunahuna kon nganong si Baruk mibatig kaluya. Tungod ba kadto sa asaynment nga iyang nadawat o tungod ba kaha sa mga sirkumstansiya diin siya mobuhat niana? Ang lintunganayng problema naggikan gayod sa iyang kasingkasing. Sa pagkatinuod, si Baruk ‘nagtinguha ug dagkong mga butang.’ Unsa man kana? Unsay gipasalig ni Jehova kang Baruk kon dawaton niya ang Iyang tambag ug pagtultol? Ug unsay atong makat-onan sa kasinatian ni Baruk?

UNSA KADTONG “DAGKONG MGA BUTANG”?

3. Unsa ang lintunganayng hinungdan sa problema sa espirituwalidad ni Baruk?

³ Lagmit si Baruk nasayod gayod kon unsa ang “dagkong mga butang.” Siya nahibalo nga ang ‘mga mata sa Diyos anaa sa mga dalan sa tawo, ug iyang makita ang tanan niyang mga lakang.’ (Job 34:21) Dili tungod sa iyang asaynment nga gibati ni Baruk nga siya walay “dapit-pahulayan” samtang iyang gisulat ang matagnaong mga pulong ni Jeremias. Tungod kadto sa iyang kaugalingong panglantaw kon unsay iyang giisip nga dako—kon unsay anaa sa iyang kasingkasing. Kay nalinga sa pagtinguha sa “dagkong mga butang” alang sa iyang kaugalingon, nakalimtan na ni Baruk ang mas hinungdanong mga butang, ang pagbuhat sa kabubut-on sa Diyos. (Filip. 1:10) Gipalutaw sa Bag-ong Kalibotang Hubad ang diwa sa berbo nga gigamit dinhi ug gihubad kini ingong “nagpadayon sa pagtinguha.” Busa kadto dili kay daklit, o lumalabay lamang nga hunahuna. Nagtinguha na si Baruk ug “dagkong mga butang” sa dihang siya gipasidan-an ni Jehova sa paghunong. Bisan tuod ang matinumanong sekretaryo ni Jeremias nagbuhat sa kabubut-on sa Diyos, sa samang higayon siya nangandoy ug “dagkong mga butang” alang sa iyang kaugalingon.

4, 5. Nganong ang “dagkong mga butang” ni Baruk lagmit nalangkit sa kabantog ug kadungganan, ug nganong haom ang pasidaan ni Jehova?

⁴ Ang usa tingali sa mga gikabalak-an ni Baruk maoy maylabot sa kabantog ug kadungganan. Bisan tuod si Baruk nag-alagad ingong usa ka magsusulat ni Jeremias, lagmit dili lang siya basta usa ka personal nga sekretaryo ni Jeremias. Sa Jeremias 36:32, si Baruk gitawag nga “ang sekretaryo.” Gipakita sa arkeolohikanhong ebidensiya nga siya naghupot ug taas nga katungdanan sa palasyo. Gani, gigamit ang samang titulo alang kang “Elisama nga sekretaryo,” nga gihisgotan ingong usa sa mga prinsipe sa Juda. Kini nagpakita nga si Baruk makasulod usab sa “lawak-kan-anan sa sekretaryo” sa “balay sa hari” ingong usa sa mga kaubanan ni Elisama. (Jer. 36:11, 12, 14) Nan, lagmit gayod nga si Baruk maoy usa ka edukadong opisyal sa panimalay sa hari. Si Seraias nga iyang igsoon mao ang tagdumala sa mga lawak ni Haring Zedekias ug miuban sa hari sa usa ka hinungdanong misyon ngadto sa Babilonya. (Basaha ang Jeremias 51:59.) Ingong tagdumala sa mga lawak, si Seraias lagmit maoy mag-atiman sa mga suplay ug sa sak-anan sa hari kon siya mopanaw, nga nagpakitang siya taas gayod ug katungdanan.

⁵ Dili ikahibulong nga ang usa ka tawo nga naanad sa taas nga posisyon mahimong maluya tungod sa pagrekord ug daghang mahukmanong mga mensahe batok sa Juda. Gani, nameligro ang posisyon ug karera ni Baruk tungod sa iyang pagtabang sa manalagna sa Diyos. Ug hunahunaa ang mga sangpotanan kon lumpagon na ni Jehova ang iyang gitukod, ingon sa atong mabasa sa Jeremias 45:4. Ang “dagkong mga butang” nga gihunahuna ni Baruk—ang pagbaton man ug dugang kadungganan sa palasyo sa hari o materyal nga kauswagan—mahimong kawang lamang. Kon si Baruk nagtinguhag maayong posisyon sa hinukman nga Hudiyohanong sistema nianang panahona, duna gayoy katarongan ang Diyos sa pagpugong kaniya sa maong tinguha.

6, 7. Kon ang “dagkong mga butang” ni Baruk nasentro sa materyal nga mga kabtangan, kang kinsa nato ikapanig-ingon ang iyang tinamdan?

⁶ Sa laing bahin, ang “dagkong mga butang” ni Baruk lagmit naglakip sa materyal nga kauswagan. Ang mga nasod sa palibot sa Juda misalig pag-ayo sa mga kabtangan ug bahandi. Ang Moab misalig sa iyang ‘mga buhat ug mga bahandi.’ Ingon usab niana ang Ammon. Ug gipahubit ni Jehova kang Jeremias ang Babilonya ingong “dagaya sa mga bahandi.” (Jer. 48:1, 7; 49:1, 4; 51:1, 13) Apan, sa pagkatinuod, gikondenar sa Diyos ang maong mga nasod.

⁷ Busa, kon si Baruk nagtinguha ug katigayonan ug mga bahandi, imong masabtan kon nganong gipasidan-an siya ni Jehova batok niana. Sa dihang ‘gituy-od sa Diyos ang iyang kamot batok’ sa mga Hudiyo, ang ilang mga balay ug kaumahan gitugyan ngadto sa ilang mga kaaway. (Jer. 6:12; 20:5) Ibutang ta nga ikaw kontemporaryo ni Baruk nga nagpuyo sa Jerusalem. Kasagaran sa imong mga katagilungsod—lakip ang mga prinsipe, mga saserdote, ug ang hari mismo—determinadong makig-away sa misulong nga mga Babilonyanhon. Apan, imong nasayran ang mensahe ni Jeremias: “Alagara ang hari sa Babilonya ug magpabiling buhi.” (Jer. 27:12, 17) Ang pagbaton ba ug daghan kaayong katigayonan sa siyudad magpasayon kanimo sa pagsunod sa sugo sa Diyos? Ang imo bang gugma sa maong mga kabtangan magpalihok kanimo sa pagpatalinghog sa pasidaan ni Jeremias o ikaw ba mosunod sa gibuhat sa kadaghanan? Sa pagkatinuod, ang tanang bililhong mga butang sa Juda ug Jerusalem, lakip niadtong sa templo, gipanguha ug gidala sa Babilonya. Busa, ang pagpangagpas sa materyal nga kauswagan wala gayoy kapuslanan. (Jer. 27:21, 22) Aduna bay leksiyon niini?

“IHATAG KO KANIMO INGON NGA INAGAW ANG IMONG KALAG”

8, 9. Nganong imong ikaingon nga hinungdanon ang pagkabaton ni Baruk sa iyang kalag ingong usa ka inagaw?

⁸ Karon, tagda kini: Unsay madawat ni Baruk kon iyang tumanon ang sugo sa Diyos? Oo, ang iyang kalag! Kini gigarantiya “ingon nga inagaw” alang kaniya. (Basaha ang Jeremias 45:5.) Diyutay ra kaayo ang naluwas. Kinsa? Kadtong mituman sa sugo sa Diyos nga mosurender sa mga Caldeanhon. (Jer. 21:9; 38:2) Ang uban tingali moingon, ‘Mao ra ba kanay bugti sa ilang pagkamasinugtanon?’

⁹ Buweno, handurawa ang kahimtang sa Jerusalem sa dihang kini gilikosan sa mga Babilonyanhon. Ang Jerusalem inanayng naut-ot tungod sa kagrabe sa maong paglikos. Sa kasukwahi, ang Sodoma daw napukan sa daklit lamang. Sa diwa, ang kalaglagan sa Sodoma ikaingong mas sayon pang maagwanta. (Lam. 4:6) Girekord ni Baruk ang tagna nga ang mga molupyo sa Jerusalem mangamatay pinaagi sa espada, gutom, o epidemya. Ug iyang nakita nga kini natuman gayod. Natiti ang suplay sa pagkaon sa Jerusalem. Pagkamakalilisang gayod kon ikaw anaa sa siyudad diin ang mga inahan, kinsa kinaiyanhong “maluloy-on,” naglata ug nagkaon sa ila mismong mga anak! (Lam. 2:20; 4:10; Jer. 19:9) Apan, si Baruk naluwas. Oo, taliwala sa maong kagubot, ang kinabuhi mismo sama sa usa ka inagaw, sama sa usa ka premyo sa mga mananaog human sa gubat. Dayag gayod nga gidawat ug gisunod ni Baruk ang tambag sa Diyos nga dili mangitag “dagkong mga butang.” Iyang nabatonan ang pag-uyon ni Jehova kay siya naluwas man.—Jer. 43:5-7.

MAGTINGUHA KA BA UG “DAGKONG MGA BUTANG”?

10, 11. Sa unsang paagi ang asoy bahin kang Baruk nalangkit sa atong adlaw ug kanato mismo?

¹⁰ Bisan tuod puliki si Baruk sa pagbuhat sa kabubut-on sa Diyos, dihay panahon nga kusganon ang iyang tinguha sa pagbaton ug “dagkong mga butang.” Gipasidan-an siya ni Jehova sa kapeligrohan, ug siya nagpabiling buhi ug naluwas gikan sa espirituwal nga kadaot. Kita ba usab, sama kang Baruk, matental o kaha madala sa mga tinguha sa kinahiladman sa atong kasingkasing, bisan tuod aktibong nag-alagad kang Jehova?

¹¹ Alang kang Baruk, ang pagkahimong dungganon lagmit makapatental gayod. Mahanduraw mo ba siya nga namalandong: ‘Makapadayon ba kaha ko sa akong buluhaton ingong “sekretaryo”? Makab-ot ko ba kaha ang usa ka mas taas pa nga katungdanan?’ Karon, komosta kita? Pangutan-a ang imong kaugalingon, ‘Ako ba kaha adunay tagong “mga ambisyon” nga buot magmalamposon sa usa ka kalibotanong karera karon o sa umaabot?’ Ang pipila ka batan-ong mga Kristohanon tingali mamalandong niining pangutanaha, ‘Dili ba kaha ang posibilidad nga mainila ug maadunahan pinaagig akademikanhong mga kalamposan maghaylo kanako sa pagtinguha ug “dagkong mga butang” alang sa akong kaugalingon?’

12. Sa unsang paagi ang usa ka brader nagtinguha ug dagkong mga butang alang kang Jehova, ug unsay imong ikaingon sa iyang desisyon?

¹² Usa ka brader nga nag-alagad karon sa tibuok-kalibotang hedkuwarter maoy 15 anyos pa lamang sa dihang gitanyagan ug libreng pagtuon sa usa ka unibersidad. Sa dakong kakurat sa iyang mga magtutudlo, wala niya dawata ang maong tanyag ug gipalabi hinuon ang karera ingong usa ka payunir. Pero wala gihapon mahanaw kaniya ang gugma sa pagtuon. Siya nahimong usa ka misyonaryo sa usa ka halayong isla. Didto, siya kinahanglang magtuon sa pinulongan nga gigamit sa kapin sa 10,000 ka tawo. Walay diksiyonaryo niana nga pinulongan, busa siya naghimo ug kaugalingon niyang talaan sa mga pulong. Sa kadugayan siya nahimong batid sa maong pinulongan ug giasayn sa paghubad sa pipila sa atong Kristohanong mga publikasyon. Sa ulahi, ang talaan sa mga pulong nga iyang gihimo gigamit ingong basehanan sa unang diksiyonaryo niana nga pinulongan. Kas-a iyang gisultihan ang daghang tumatambong sa usa ka distritong kombensiyon: “Kon ako mitungha pa sa unibersidad, ang bisan unsang akademikanhong kalamposan nga akong makab-ot maoy alang lamang sa akong kahimayaan. Apan tungod kay wala man koy bisan unsang sekular nga kuwalipikasyon, dili ako ang mapasidunggan sa akong nahimo. Ang tanang kadungganan iya kang Jehova.” (Prov. 25:27) Maayo ba ang desisyon nga iyang gihimo niadtong 15 anyos pa siya? Latas sa katuigan, siya nakapahimulos ug daghang pribilehiyo taliwala sa katawhan sa Diyos. Sa imong bahin, unsaon man nimo paggamit ang imong talento? Inay magtinguha sa kaugalingong kahimayaan, determinado ka ba nga gamiton kini sa pagdayeg kang Jehova?

13. Nganong kinahanglang palandongon sa pipila ka ginikanan ang hagit nga giatubang ni Baruk?

¹³ Kini ang nalangkit nga kapeligrohan: ang pagtinguhag “dagkong mga butang” alang sa atong gimahal o pagtinguha niini pinaagi kanila kinsa mahimo natong maimpluwensiyahan. Lagmit nakakita ka ug kalibotanong mga ginikanan nga naningkamot pag-ayo aron ang ilang anak mas magmalamposon sa kinabuhi kay kanila o aron ila kining ikapanghambog. Tingali nakadungog kag mga komento nga sama niini: “Dili ko gustong magkalisodlisod siya sama sa akong naagian” o “Gusto nakong paeskuylahon ang akong anak sa unibersidad aron mahayahay ang iyang kinabuhi.” Mahimong ingon usab niini ang bation sa Kristohanong mga ginikanan. Tinuod, ang usa tingali moingon: ‘Wala man ko magtinguhag dagkong mga butang alang sa akong kaugalingon.’ Apan dili ba kaha nga gigamit niya ang iyang anak aron mabatonan kini? Maingon nga si Baruk tingali nadani sa pagtinguhag kadungganan pinaagi sa iyang posisyon o karera, ang usa ka ginikanan usab tingali sa hilom mangandoy niana pinaagi sa kalamposan sa iyang mga anak. Apan dili ba masayran kini sa “tig-usisa sa mga kasingkasing,” sama sa iyang gihimo kang Baruk? (Prov. 17:3) Dili ba nato ipasusi sa Diyos ang kinasulorang bahin sa atong mga hunahuna, ingon sa gihimo ni David? (Basaha ang Salmo 26:2; Jeremias 17:9, 10.) Mahimong gamiton ni Jehova ang lainlaing mga paagi, sama niining atong gihisgotan bahin kang Baruk, aron pasidan-an kita sa kapeligrohan maylabot sa pagtinguhag “dagkong mga butang.”

ANG LIT-AG SA “BILILHONG MGA BUTANG”

14, 15. Sa unsang paagi ang mga bahandi mahimong “dagkong mga butang” alang kanato?

¹⁴ Ibutang ta nga ang “dagkong mga butang” ni Baruk mao ang materyal nga mga bahandi. Ingon sa nahisgotan na, kon nawili pa pag-ayo si Baruk sa iyang mga kabtangan sa Juda, lagmit malisdan gayod siya sa pagsunod sa sugo sa Diyos nga mosurender sa mga Caldeanhon. Tingali imong nakita nga ang tawong dato sagad magsalig sa iyang “bililhong mga butang,” apan gipamatud-an sa Bibliya nga ang proteksiyon nga ikahatag niining mga butanga anaa ra “sa iyang hunahuna.” (Prov. 18:11) Matabangan ang tanang alagad ni Jehova kon ilang hinumdoman ang timbang nga panglantaw bahin sa materyal nga mga butang nga mabasa sa iyang Pulong. (Basaha ang Proverbio 11:4.) Apan, tingali ang uban mangatarongan, ‘Nganong di man nato tilawan ang gitanyag sa kalibotan?’

¹⁵ Tungod sa gugma sa mga kabtangan, ang usa ka Kristohanon tingali mangandoy ug mga butang nga bahin sa usa ka lumalabay nga sistema sa mga butang. Dili ingon niana si Jeremias ug Baruk. Katuigan sa ulahi, si Jesus naghatag ug pasidaan sa mga tawo nga buhi sa panahon nga “igapadayag ang Anak sa tawo.” Giingnan sila ni Jesus: “Hinumdomi ninyo ang asawa ni Lot.” Haom gayod usab nga awhagon ang mga Kristohanon: ‘Hinumdomi ninyo si Jeremias ug Baruk.’ (Luc. 17:30-33) Kon dako ang atong gugma sa materyal nga mga butang, malisdan gayod kita sa pagpadapat sa mga pulong ni Jesus. Apan ayaw kalimti nga si Baruk namati sa pasidaan sa Diyos ug busa siya nagpabiling buhi.

16. Iasoy ang usa ka kahimtang diin ang mga alagad sa Diyos nagbaton ug hustong panglantaw sa materyal nga mga butang.

¹⁶ Tagda ang kahimtang sa mga igsoon sa Romania panahon sa Komunistang pagmando. Samtang gironda ang mga balay sa mga Saksi, usahay ang mga polis manguhag personal nga mga butang, ilabina kadtong ilang ikabaligya. (Lam. 5:2) Daghang igsoong lalaki ug babaye ilalom niana nga pagmando ang andam nga mawad-an sa ilang mga kabtangan. Ang uban napugos sa pagbiya sa ilang mga kabtangan sa dihang sila gidala ngadto sa laing lugar, apan sila nagpabilin gihapon sa ilang integridad kang Jehova. Kon makaatubang ka sa maong pagsulay, tugotan mo ba ang gugma sa materyal nga mga butang nga maoy mobabag sa imong pagpabiling maunongon sa Diyos?—2 Tim. 3:11.

17. Sa unsang paagi ang pipila ka kontemporaryo ni Jeremias ug Baruk lagmit nakatabang kanila?

¹⁷ Makaiikag nga si Jeremias ug Baruk gitabangan sa uban nilang mga kontemporaryo. Si Sofonias nanagna panahon sa paghari ni Josias sa dihang si Jeremias nag-alagad ingong manalagna. Unsa kahay gihunahuna ni Jeremias bahin sa mga pulong nga atong mabasa sa Sofonias 1:18? (Basaha.) Ug dili mo ba mahanduraw si Jeremias nga nagpatin-aw kang Baruk sa maong inspiradong tagna? Ang laing kontemporaryo mao si Ezequiel, kinsa gidalang binihag sa Babilonya niadtong 617 W.K.P. Ang pipila sa iyang mga kalihokan ug mensahe direktang nalangkit sa mga Hudiyo nga didto pa sa ilang yutang natawhan, busa si Jeremias lagmit nakakat-on sa gipamulong o gibuhat ni Ezequiel, ug mao man usab si Ezequiel kang Jeremias. Lakip gayod niana ang mga pulong nga girekord sa Ezequiel 7:19. (Basaha.) Maingon nga mapuslanon kang Jeremias ug Baruk kining maong inspiradong mga pulong, kini mapuslanon usab kanato. Ang katawhan motawag sa ilang mga diyos aron luwason sila sa adlaw ni Jehova. Bisan pa niana, dili makaluwas kanila ang ilang mga diyos ni ang ilang mga bahandi.—Jer. 2:28.

MABATONAN MO BA ANG “IMONG KALAG INGON NGA INAGAW”?

18. Kang kinsang “kalag” ang buot natong mabatonan ingong inagaw, ug sa unsang paagi mahimo nato kini?

¹⁸ Angay natong hinumdoman nga ang gisaad ni Jehova kanato ingong inagaw mao ang atong “kalag.” Bisan pag ang pipila sa iyang mga alagad mamatay sa paglutos panahon sa “dakong kasakitan” sa dihang ang politikanhong mga sungay sa mapintas nga mananap mobalitok na sa relihiyon, dili bug-os mapildi ang maong mga matinumanon. Ang ilang “kalag” gigarantiyahan ug pagkabanhaw aron makapahimulos sa “tinuod nga kinabuhi” sa bag-ong kalibotan. (Pin. 7:14, 15; 1 Tim. 6:19) Hinuon, makasalig kita nga ang kadaghanan sa mga alagad sa Diyos nga magmatinumanon nianang panahona makalabang sa dakong kasakitan. Ikaw makaseguro nga kon ipadangat na sa Diyos ang katalagman batok sa mga nasod, walay matinumanon nga maapil ‘niadtong pamatyon ni Jehova.’—Jer. 25:32, 33.

19. Sa unsang mga paagi ang pagtagad sa mga panig-ingnan ni Jeremias ug Baruk makapalig-on sa imong determinasyon nga dili magtinguha ug “dagkong mga butang” alang sa imong kaugalingon?

¹⁹ Alang sa pipila, tingali makapasubong hunahunaon nga sila maluwas nga “kalag” lamang ang mabatonan ingong inagaw, apan kana dili gayod angayng makapahigawad kanila. Hinumdomi nga samtang ang katawhan sa Jerusalem nangamatay tungod sa gutom, giluwas ni Jehova si Jeremias. Sa unsang paagi? Gitener ni Haring Zedekias si Jeremias sa Sawang sa Guwardiya ug gipahatagan siyag “lingin nga tinapay . . . adlaw-adlaw gikan sa dalan sa mga panadero, hangtod nahurot ang tanang tinapay sa siyudad.” (Jer. 37:21) Ug si Jeremias naluwas! Si Jehova makagamit sa bisan unsang paagi nga iyang pilion aron sa pagtabang sa iyang katawhan. Apan iya gayong tabangan ang iyang katawhan, kay garantisado ang ilang paglaom sa kinabuhing walay kataposan. Naluwas si Baruk sa kalaglagan sa Jerusalem tungod kay siya wala ‘magtinguha ug dagkong mga butang.’ Sa samang paagi, makalaom kita nga maluwas sa Armagedon aron dayegon si Jehova ug mahuptan ang atong “kalag” ingong inagaw nga mapahimuslan hangtod sa hangtod.