CANDACE

Usa ka rayna sa Etiopia kansang mamahandi nahimong usa ka Kristohanon. (Buh 8:27) Inay usa ka espesipikong personal nga ngalan, ang “Candace,” sama sa “Paraon” ug “Cesar,” giisip nga usa ka titulo. Ang karaang mga magsusulat, lakip kang Strabo, Pliny nga Magulang, ug Eusebius, naggamit niini nga ngalan sa paghisgot sa mga rayna sa Etiopia. Si Pliny nga Magulang (mga 23-79 K.P.) misulat nga “ang lungsod [sa Meroë, kaulohan sa karaang Etiopia] may pipila ka tinukod. Sila miingon nga kini gimandoan sa usa ka babaye, si Candace, usa ka ngalan nga gigamit sa misunod nga mga rayna sulod sa daghang katuigan.”​—Natural History, VI, XXXV, 186.