KINERET

1. Usa ka kinutaang siyudad sa Neptali. (Jos 19:​32, 35) Gituohan karong adlawa nga kini mao ang Khirbet el-ʽOreimeh (Tel Kinnerot), nga nahimutang sa usa ka bungdo nga kapin sa 3 km (2 mi) sa HK sa Capernaum, nga nag-umbaw sa AK nga bahin sa Dagat sa Galilea. Ang Kineret makita diha sa mga paril sa templo sa Karnak didto sa Thebes, Ehipto, diha sa talaan sa mga siyudad sa Canaan nga gisakop ni Thutmose III (kansang paghari gipetsahan sa mga historyador sa ika-16 nga siglo W.K.P.).

2. Usa ka distrito o rehiyon sa Israel nga gisulong sa Siryanhon nga si Haring Ben-hadad I tungod sa pagsulsol ni Haring Asa sa Juda. (mga 962 W.K.P.) (1Ha 15:20; itandi ang 2Cr 16:4.) Ang ekspresyon nga “tibuok Kineret” sagad nga giisip nga nagtumong sa tabunok nga Patag sa Genesaret.

3. Ang unang ngalan sa Dagat sa Galilea. (Num 34:11) Gilangkit ang ngalan sa Hebreohanong pulong alang sa alpa (kin·nohrʹ), ang pipila nagsugyot nga kini nagtumong sa lanaw tungod kay pormag-alpa kini nga katubigan. Ang mga ngalang Dagat sa Galilea ug Dagat sa Tiberias ingon man ang Genesaret, lagmit ang Gregong porma sa maong ngalan, gigamit sa dihang si Jesus dinhi sa yuta.​—Luc 5:1; Ju 6:1.

Dugang pa sa paglakip niini sa mga utlanan sa Yutang Saad (Num 34:11), ang lanaw nahimong bahin sa K nga utlanan sa Amorihanong gingharian ni Og ug, human masakop sa Israel, kini gihisgotan diha sa K nga utlanan sa tribo ni Gad. (Deu 3:​16, 17; Jos 13:24-27) Ang paghisgot sa “desyertong kapatagan [Heb., ʽara·vahʹ] sa habagatan sa Kineret” (Jos 11:2) lagmit nagtumong sa seksiyon sa Walog sa Jordan sa H sa Dagat sa Galilea, nga gitawag ug Ghor.​—Tan-awa ang GALILEA, DAGAT SA.