GENESARET

1. Usa ka gamay, daw triyanggulo nga patag nga mosukod ug mga 5 por 2.5 km (3 por 1.5 mi) daplin sa AK nga baybayon sa Dagat sa Galilea. Niini nga rehiyon, gihimo ni Jesu-Kristo ang milagrosong mga pagpang-ayo. (Mat 14:34-36; Mar 6:53-56; HULAGWAY, Tomo 2, p. 739) Sumala sa Hudiyong historyador nga si Josephus, kini nga patag maoy maanindot, mabungahon, ug daghan ug tubig nga rehiyon, diin daghan ang mga kahoyng walnut, palma, ug olibo, ug diin ang mga igos ug ubas mabatonan sulod sa napulo ka bulan sa tuig.​—The Jewish War, III, 516-521 (x, 8).

2. Ang “lanaw sa Genesaret” maoy laing ngalan sa Dagat sa Galilea. (Luc 5:1) Gituohan sa pipila ka eskolar nga ang Genesaret lagmit mao ang Gregong porma sa unang Hebreohanong ngalan nga Kineret.​—Num 34:11; tan-awa ang GALILEA, DAGAT SA.