PIYANGPIYANG

Sa kapanahonan sa Bibliya, kini maoy usa ka tulonggon nga pingkion nga susama sa modernong mga piyangpiyang, nga sagad iduyog sa alpa, trompeta, ug uban pang mga tulonggon. (2Sa 6:5; 1Cr 15:28; 2Cr 5:​12, 13) Ang duha ka Hebreohanong mga pulong alang sa mga piyangpiyang (tsel·tselimʹ ug metsil·taʹyim) naggikan sa lintunganayng pulong nga tsa·lalʹ, nga nagkahulogang “mosanting; mokurog.” (1Sa 3:11; Hab 3:16) Sumala sa 1 Cronicas 15:​19, ang mga piyangpiyang alang sa templo ni Jehova maoy ginama sa tumbaga, apan gawas niini wala nay dugang paghubit ang Kasulatan. May usa ka paris nga piyangpiyang nga nakaplagan sa usa ka karaang lubnganan didto sa Ehipto nga lagmit kokaamgid sa mga piyangpiyang sa Bibliya. Kini maoy mga 14 sm (5.5 pul.) ang diyametro nga may mga kuptanan sa tunga, ug kini ginama sa tumbaga nga gisagolan ug diyutayng plata.

Ang Salmo 150:5 nagpaila nga kapin sa usa ka matang sa piyangpiyang ang lagmit nailhan sa Israel. Ang unang paglutaw niini nga termino diha niini nga teksto naghubit sa “mga piyangpiyang nga mananoy,” samtang ang ikaduhang paghisgot maoy maylabot sa “piyangpiyang nga nagapangkaay.” Tungod kay ang matag estansa sa bersikulo 3 ug 4 niini nga awit nagtumong man sa usa o kapin pang lainlain nga mga tulonggon, ang duha ka estansa sa bersikulo 5 mahimong kanunayng nagtumong, una, sa mas gamay, tagingting nga mga piyangpiyang ug, ang ikaduha, ngadto sa mga piyangpiyang nga mas dagko nga nagpatunghag mas lanog, mas lawom nga tunog, sa dihang kusgon pagpingki.

Ang hulagway sa “usa ka nagapangkaay nga piyangpiyang” gigamit ni apostol Pablo sa pag-ilustrar sa pagkasalingkapaw sa usa ka tawo nga nagasultig lainlaing mga pinulongan, kon wala ang motibo nga gugma. (1Co 13:1) Hinunoa, ang ubang mga paghisgot sa mga piyangpiyang, dugang pa sa nahisgotan na, maoy maylabot sa pagsimba kang Jehova. (1Cr 13:8; 16:​5, 42; 25:​1, 6; 2Cr 29:25; Esd 3:10; Neh 12:27) Sa matag higayon nga nalangkit ang pag-alagad sa templo, ang binansay nga mga Levihanon mao ang mga manunugtog. (1Cr 16:​4, 5, 42) Samtang ang pipila ka eskolar mipabor sa pagtuo nga ang mga piyangpiyang maoy tulonggon lamang sa mga Levihanon ug usab sa mga saserdote, ang Salmo 150:​1, 5 lagmit nagpaila nga kini gigamit sa kadaghanan: “Dayega ninyo si Jah! . . . Dayega siya pinaagi sa mga piyangpiyang.”