ENELDO

[Gr., aʹne·thon].

Ang modernong mga leksikograpo nagkauyon nga ang tanom nga gipasabot sa Gregong termino nga aʹne·thon mao ang eneldo (Anethum graveolens) inay nga ang anis (Gr., anʹne·son), sama sa makita diha sa mas karaang mga hubad (KJ, Dy). Karong adlawa mas komon nga gitanom sa rehiyon sa Palestina ang eneldo kay sa anis, ug adunay ebidensiya nga kini gitanom sukad pa sa karaang kapanahonan didto sa Tungang Sidlakan, ingon man usab sa mga Grego ug mga Romano. Ang eneldo maoy lakip sa mga tanom nga makutihong gihatag sa salingkapawng mga Pariseo ingong ikapulo, samtang sila napakyas sa pagtagad sa mas bug-at nga mga butang sa Balaod. (Mat 23:23) Ang Hudiyohanong Mishnah (Maʽaserot 4:5) naglatid nga dili lamang ang mga liso kondili usab ang tanom ug ang mga bunga sa eneldo ang pangayoan ug ikapulo.

Kini nga tanom maoy samag bunglayon, nga kaamgid sa anis, ug adunay gitas-on nga mga 0.5 m (2 p) nga may samag-gihay, lunlon berde nga mga dahon ug may hugpong sa gagmay, dalag nga mga bulak. Gitanom kini tungod sa humot nga mga liso niini, nga mas gipabilhan pag-ayo ingong panimpla sa mga pagkaon ug ingong tambal usab sa mga sakit sa tiyan.