DOR

Usa sa mga siyudad sa Palestina nga nakig-alyansa sa Canaanhon nga si Haring Jabin sa Hazor aron sa pagpakiggubat kang Josue (Jos 11:​1, 2) ug dali ra nga giparot. (Jos 11:12; 12:23) Bisan tuod ang Dor ug ang sakop nga mga lungsod niini nahimutang sa teritoryo sa Aser, kini gihatag ngadto sa tribo ni Manases apan wala nila mapapahawa ang nahibiling mga molupyo didto. (Jos 17:11-13; 1Cr 7:29) Sa ulahi ang teritoryo sa Dor, nga gidumala sa usa sa mga umagad nga lalaki ni Solomon, nagtagana ug pagkaon alang sa panimalay sa hari usa ka bulan sulod sa usa ka tuig.​—1Ha 4:11.

Ang siyudad sa Dor sagad gituohan nga mao ang Khirbet el-Burj (Tel Dor), 13 km (8 mi) sa A sa Cesarea diha sa hataas ug hiktin nga patag daplin sa baybayon nga nag-ubay sa Dagat Mediteranyo. Ang pag-ingon nga kining dapita nahimutang diha sa patag daplin sa baybayon nakapatunghag pangutana bahin sa kahulogan sa gigamit kanunay nga mga pulong nga “mga tagaytay [gikan sa Heb. nga na·phahʹ] sa Dor.” (Jos 11:2) Ang pipila ka eskolar nagtuo nga kini nagtumong sa mga pangpang nga naglumbay diha sa kadaghanang bahin sa baybayon niini nga rehiyon, sa ingon naglangkit sa Hebreohanong na·phahʹ sa terminong Arabiko nga nafnaf, nga nagkahulogang “pangpang.” Ang uban nagtuo nga kini mao ang bungtorong mga bakilid nga nagsugod 3 km (2 mi) pailaya gikan sa Dor hangtod sa mga tayuktok sa Bukid sa Carmelo.