DURA

Ang kapatagan diin didto gipatindog ni Nabucodonosor ang larawan nga bulawan.​—Dan 3:1.

Gihubit kini sa Bibliya nga “anaa sa sakop nga distrito sa Babilonya,” ug busa dayag nga haduol ra sa maong siyudad. Tungod niini, gidawat sa pipila ka eskolar karon ang Tulul Dura, 10 km (6 mi) sa HS sa Babilonya, nga lagmit mao ang nahimutangan niini taliwala sa daghang gituohang mga dapit. Ang mga kagun-oban sa usa ka bungdo sa uga nga tisa nga misukod ug 14 m (46 p) kuwadrado nadiskobrehan dinhi ug gituohan sa pipila nga mao ang gipatongan sa larawan nga gipabuhat ni Nabucodonosor. Bisan pa niana, ang Akadianhong termino nga duru, nga nagkahulogang “gipalibotan,” “paril,” o “pinarilang dapit,” kanunay nga makita diha sa ngalan sa mga dapit sa Mesopotamia, nga tungod niini lisod ang pagtino kon diin gayod kini nahimutang karong panahona.