EHUD
1. Usa ka kaliwat ni Jediael sa tribo ni Benjamin, pinaagi kang Bilhan; usa ka maisog, gamhanang tawo.—1Cr 7:6, 10, 11.
2. Anak nga lalaki ni Gera sa tribo ni Benjamin (Huk 3:15), si Ehud gipili sa Diyos aron sa pagluwas sa nasod gikan sa 18-ka-tuig nga pagkaulipon kang Haring Eglon sa Moab, usa ka pagpanglupig nga gitugotan sa Diyos tungod kay “ilang gibuhat ang daotan sa mga mata ni Jehova.”—Huk 3:12-14.
Sa dihang ang mga Israelinhon mituaw kang Jehova alang sa tabang, ang Diyos nagpatindog ug “usa ka manluluwas” nga mao si Ehud. Sa ulahi, ang mga Israelinhon nagpadalag tributo o buhis ngadto kang Eglon pinaagi kang Ehud, kinsa naghimo ug duhay-sulab nga espada alang sa iyang kaugalingon, “nga ang gitas-on usa ka maniko [Heb., goʹmedh],” usa ka sukod sa gitas-on nga dili matino niining partikular nga kahimtang. Ang pipila nagtuo nga usa kini ka mubong maniko nga mga 38 sm (15 pulgadas). Si Ehud walhon, o sa literal, “usa ka tawo nga natakpan (napugngan) ang tuong kamot.” Apan wala kini magpasabot nga si Ehud depektosog kamot, sanglit kining Hebreohanon nga ekspresyon gigamit man maylabot sa 700 ka Benjaminhong manggugubat, kinsa wala gayoy pisikal nga depekto apan mga “walhon” ug dayag nga hanas nga makagamit sa ilang duha ka kamot. (Huk 3:15, 16, ftn sa Rbi8; 20:16; itandi ang 1Cr 12:2.) Ang Bibliya wala maghisgot sa espesipiko nga si Ehud hanas nga makagamit sa iyang duha ka kamot, bisan tuod posible kana. Bisan pa niana, kay walhon, iyang gitakin ang iyang espada diha sa ilalom sa iyang besti sa tuo niya nga paa.
Human sa paghatag sa tributo, gipalakaw ni Ehud ang nagdala sa tributo apan siya mibalik sa mga kubkobanan sa bato didto sa Gilgal. Si Ehud miadto kang Eglon samtang ang Moabihanong hari naglingkod didto sa iyang lawak-sa-atop, ug siya miingon kaniya: “Aduna akoy pulong sa Diyos alang kanimo.” Kay interesado, si Eglon mitindog gikan sa iyang trono. Niana, si Ehud “pinaagi sa iyang walang kamot mibakyaw ug mihulbot sa espada gikan sa iyang tuo nga paa,” ug miduslak niini ngadto sa nagbuy-on nga tiyan ni Eglon, nga tungod niana “ang puloan midulot usab uban sa sulab mao nga ang sulab natabonan sa tambok.” Ang usa ka tuohon nga tawo lagmit mohulbot sa iyang espada gikan sa walang kiliran sa iyang lawas. Busa wala gayod magdahom si Eglon nga si Ehud mohulbot ug espada gikan sa tuong paa, ginamit ang iyang walang kamot. Sanglit ang kaaway nga magmamando patay na, si Ehud miikyas agi sa bangag alang sa hangin, human sirad-i ug trangkahi ang mga pultahan sa lawak-sa-atop sa iyang luyo. Sa dihang giablihan na sa mga alagad ni Eglon ang mga pultahan, nadiskobrehan nila nga ang “ilang ginoo nagbuy-od nga patay na diha sa yuta!”—Huk 3:15-25.
Si Ehud, kay nakaikyas na ngadto sa bukirong rehiyon sa Epraim, nagtigom ug Israelinhong kasundalohan, nga nag-ingon kanila: “Sunod kanako, tungod kay si Jehova nagtugyan na sa inyong mga kaaway, ang mga Moabihanon, nganha sa inyong kamot.” Human mailog ang tabokanan nga bahin sa Jordan, napugngan sa mga Israelinhon ang pagsibog sa mga Moabihanon ngadto sa ilang yutang natawhan. Walay duhaduha nga nawad-an sa kadasig tungod sa pagkamatay sa ilang hari, 10,000 ka Moabihanon ang gipatay sa mga Israelinhon, “ang matag baskog ug ang matag maisog nga lalaki; ug walay bisan usa nga nakaikyas.” Sanglit nabuntog na ang Moab ilalom sa kamot sa Israel ug sa pagpangulo ni Ehud, “ang yuta wala nay kasamok pa sulod sa kawaloan ka tuig.”—Huk 3:26-30.
Si Ehud wala tawga sa espesipiko nga “Maghuhukom Ehud”; hinuon siya gitawag nga “usa ka manluluwas.” (Huk 3:15) Apan si Otniel gitawag nga “usa ka manluluwas” ug usa ka “maghuhukom” (Huk 3:9, 10), ug ang yugto mao ang panahon sa mga Maghuhukom. Busa dayag nga si Ehud giisip dili lamang nga “usa ka manluluwas” kondili usa ka maghuhukom usab.
3. Usa ka ngalan nga makita nga lakip sa mga kaliwat ni Benjamin sa 1 Cronicas 8:1, 6.