ELDAD

[lagmit, Ang Diyos Nahigugma].

Usa sa 70 ka ansiyano nga gipili ni Moises nga motabang kaniya sa pagpas-an sa luwan sa mga tawo. Tungod sa pagbagulbol sa nagkasagol nga panon sa katawhan ug usab sa mga Israelinhon mahitungod sa mana ug sa kawalay karne nga makaon, si Moises mituaw nga ang luwan bug-at ra kaayo alang kaniya nga mag-inusara. Busa si Jehova nagsugo kang Moises sa pagtigom ug 70 ka ansiyano ug dad-on sila ngadto sa tolda nga tagboanan. Hinunoa, duha niini nga mga ansiyano, si Eldad ug Medad, wala moadto sa tolda nga tagboanan apan, sa walay duhaduha tungod sa makataronganong hinungdan, nagpabilin sa kampo. Niadtong tungora si Jehova mikuha ug bahin sa espiritu nga diha kang Moises ug gibutang kini sa mga ansiyano; ug kini sila nanagna. Ang espiritu mikunsad usab kang Eldad ug Medad, ug sila migawi ingong mga manalagna sa kampo. Gitaho kini kang Moises, ug sa dihang si Josue, nga nangabugho alang kang Moises, mihangyo nga iyang pugngan sila, si Moises mitubag: “Ayaw, nanghinaot ako nga ang tanang katawhan ni Jehova mga manalagna, tungod kay si Jehova magabutang sa iyang espiritu diha kanila!”​—Num 11:13-29.