ELEASAR

[Ang Diyos Nagtabang].

1. Ang ikatulong ginganlan nga anak nga lalaki sa Hataas nga Saserdoteng si Aaron pinaagi sa iyang asawa nga si Eliseba. Si Eleasar gikan sa banay ni Kohat nga anak ni Levi. (Ex 6:​16, 18, 20, 23; Num 3:2) Si Aaron ug ang iyang mga anak, si Nadab, Abihu, Eleasar, ug Itamar, maoy naglangkob sa pagkasaserdote sa Israel sa panahon nga gipahiluna kini ni Moises.​—Lev 8.

Sa ikaduhang tuig human mobiya sa Ehipto, sa dihang natukod na ang tabernakulo, si Eleasar gihisgotan ingong pangulo sa mga Levihanon. (Num 1:1; 3:32) Labing menos 30 anyos siya niadtong panahona, sanglit nangatungdanan na siya ingong saserdote.​—Num 4:3.

Si Eleasar usa niadtong kapin sa 20 anyos ang edad nga mibiya sa Ehipto ug nakasulod usab sa Yutang Saad. Kay gikan sa tribo ni Levi, siya dili apil sa paghukom nga gipahayag sa Diyos batok sa ubang 12 ka tribo, nga walay usa kanila gikan sa 20 anyos pataas ang makasulod sa Yutang Saad, gawas lamang kang Josue ug Caleb. Ang tribo ni Levi walay hawas taliwala sa 12 ka espiya, nga 10 niini nagdala ug daotang taho, ug dayag nga ang mga Levihanon dili apil sa walay pagtuo, rebelyoso nga pagbagulbol batok kang Jehova.​—Num 13:4-16; 14:26-30.

Wala madugay human sa pagpahinungod sa tabernakulo ug sa pagkonsagrar kang Aaron ug sa iyang mga anak alang sa pagkasaserdote (Lev 8), si Nadab ug Abihu naghalad ug ginadili nga kalayo ngadto kang Jehova ug sila gipatay pinaagi sa kalayo nga naggikan kang Jehova. (Lev 10:​1, 2; Num 3:2-4) Si Aaron, uban sa iyang duha ka matinumanong mga anak nga si Eleasar ug Itamar, nagpadayon sa pagkasaserdote. Sa dihang nabahin ang mga katungdanan sa pag-atiman sa sangtuwaryo, gidumala ni Eleasar ang tabernakulo ug ang mga galamiton niini, ang makanunayong halad-nga-lugas, lana, ug insenso. (Num 4:16) Sa pagsunod sa sugo ni Jehova, gikuha ni Eleasar ang tumbaga nga mga insensaryo nga gigamit ni Kore ug sa uban nga miabin kaniya (walay usa kanila nga saserdote) sa paghalad ug insenso kang Jehova aron mopuli sa mga katungdanan sa saserdote. Kini gihimong nigpis nga metal nga mga palid nga gihaklap sa halaran. (Num 16:37-40) Si Eleasar ang nagdumala sa halad-sa-sala pinaagig mapulang nating baka nga magtaganag abo nga gamiton sa paghinlo sa pipila ka kahugawan.​—Num 19:​2, 3, 9; Heb 9:13.

Human makiggubat ang mga Israelinhon aron silotan ang mga Midianhon tungod sa panghitabo sa Peor, didto si Eleasar aron motabang sa pagbahin sa mga inagaw nga nakuha gikan sa mga Midianhon ug sa pagpahayag sa lagda sa Diyos mahitungod sa mga butang nga naagaw.​—Num 31:​6, 21-41.

Si Pinehas, nga anak nga lalaki ni Eleasar pinaagi sa usa sa mga anak nga babaye ni Putiel, gigantihan ni Jehova pinaagig pakigsaad sa pakigdait tungod sa iyang masibotong paglihok alang sa putli nga pagsimba dihang ang Israel nakasala labot sa Baal sa Peor. Kini mahimong isipon nga dugang pa sa pakigsaad alang sa pagkasaserdote nga gihimo ni Jehova uban sa tribo ni Levi.​—Num 25:1-13; Ex 6:25.

Nahimong Hataas nga Saserdote. Sa ika-40 nga tuig sa pagpanaw sa kamingawan, sa pagkamatay ni Aaron sa edad nga 123 anyos, si Eleasar, nga mga 70 anyos niadtong tungora, nahimong hataas nga saserdote. (Num 33:37-39) Busa, si Eleasar mao ang unang hataas nga saserdote sa Israel nga nangatungdanan didto sa Yutang Saad sa dihang misulod sila niini mga walo ka bulan sa ulahi. (Num 20:25-28; Deu 10:6; Jos 4:19) Sa atubangan ni Eleazar kinahanglang mobarog si Josue aron itudlo nga manununod ni Moises, ug si Eleasar padayong magpaluyo sa pagkatudlo ni Josue ug magpasa kaniya sa mga desisyon ni Jehova labot sa hinungdanong mga pangutana sumala sa hukom sa Urim ug sa Tumim. (Num 27:18-23) Si Eleasar kauban usab ni Josue sa pagbahinbahin sa Yutang Saad human masakop ang Canaan.​—Jos 14:1; 21:1-3.

Pangulo sa Pangunang Saserdotehanon nga Banay. Ang tukmang panahon sa pagkamatay ni Eleasar wala iasoy sa Kasulatan, apan lagmit duol ra kini sa panahon sa pagkamatay ni Josue. Si Eleasar gipulihan sa iyang anak nga lalaking si Pinehas. (Jos 24:​29, 30, 33; Huk 20:​27, 28) Si Eleasar nagpakitag kasibot alang sa matuod nga pagsimba kang Jehova ug dungganong nagdumala sa pagkasaserdote sa tanan niyang mga adlaw. Ang Hudiyohanong tradisyon nagtuo nga sa dihang ang tabernakulo didto pa sa Shilo, dihay 16 ka grupo sa mga saserdote, 8 sa banay ni Eleasar ug 8 sa banay sa iyang igsoon nga si Itamar. Hinunoa, sa panahon ni David mas daghan ang mga lalaki nga pangulo sa banay ni Eleasar kay sa banay ni Itamar. Busa naghimo si David ug 16 ka saserdotehanong dibisyon sa banay ni Eleasar ug 8 sa banay ni Itamar, nga may katibuk-ang 24 ka dibisyon nga nag-alagad nga turnoturno didto sa templo sa ulahi.​—1Cr 24:1-4.

2. Anak nga lalaki ni Abinadab nga gibalaan aron sa pagbantay sa sagradong Arka nga gidala ngadto sa balay sa iyang amahan sa siyudad sa Kiriat-jearim, human kini ibalik sa mga Filistehanon.​—1Sa 7:​1, 2.

3. Anak nga lalaki ni Dodo nga Ahohihanon; usa sa tulo ka talagsaong gamhanan nga mga tawo ni David. Sa Pas-damim, sa pagpakiggubat uban ni David, gipaila ni Eleasar ang iyang katakos pinaagig pagbarog diha sa usa ka luna nga puno sa sebada ug nag-inusarang gipatay ang mga Filistehanon, “mao nga si Jehova nagluwas pinaagi sa usa ka dakong kaluwasan.”​—1Cr 11:12-14; 2Sa 23:​9, 10.

4. Anak nga lalaki ni Mali nga Merarihanon sa tribo ni Levi. Si Eleasar walay mga anak nga lalaki apan mga babaye lamang. Busa, ang mga anak nga lalaki ni Kis, nga ilang mga ig-agaw, nangasawa kanila.​—1Cr 23:​21, 22.

5. Anak nga lalaki sa usa ka Pinehas, nga gihisgotan nga mitabang kang Meremot nga saserdote sa dihang, sa ikaupat nga adlaw sukad sa pag-abot ni Esdras sa Jerusalem, ang plata ug ang bulawan ug ang mga galamiton sa templo gitimbang.​—Esd 8:​29, 32, 33.

6. Usa ka kaliwat ni Paros nga apil niadtong nangasawa ug mga langyaw apan namati sa tambag ni Esdras sa paghingilin kanila.​—Esd 10:​25, 44.

7. Usa ka saserdoteng Levihanon sa parada nga gihikay ni Nehemias sa inagurasyon sa pagtukod pag-usab sa paril sa Jerusalem.​—Neh 12:42.

8. Usa ka katigulangan sa amaama ni Jesus nga si Jose.​—Mat 1:15.