ITAMAR

[lagmit, Amahan (o, Igsoong Lalaki) sa Kahoyng Palma].

Ang ikaupat nga gilista sa mga anak nga lalaki ni Aaron. (Ex 6:23; Num 26:60; 1Cr 6:3) Human madumala ang pag-imbentaryo sa mga butang sa tabernakulo, si Itamar, kauban sa iyang amahan ug mga igsoong lalaki, gipahiluna sa katungdanan ingong saserdote sumala sa seremonyas nga gibatbat sa Exodo 29. (Ex 28:1; 38:21; 40:12-15) Sa dihang ang iyang duha ka magulang nga lalaki, si Nadab ug Abihu, gipatay sa ulahi tungod sa paghalad ug “ginadili nga kalayo,” si Itamar ug ang iyang ikatulong igsoon nga lalaki nga si Eleasar gisultihan nga dili magbangotan tungod kanila. Sa ulahi, si Itamar ug Eleasar nakadawat ug mas dakong bahin sa mga katungdanan sa pagkasaserdote sumala sa anam-anam nga paglatid ni Jehova niini. (Lev 10:1-20) Si Itamar ang gihimong magtatan-aw sa nagkalainlaing pag-alagad sa tabernakulo nga gihimo sa mga Gersonhon ug Merarihanon.​—Num 3:2-4; 4:​28, 33; 7:8.

Ang mga kaliwat ni Itamar nagpadayon ingong mga saserdote, ug sa panahon sa paghari ni Saul, David, ug Solomon, ang mga membro sa balay sa kaliwat ni Itamar nga si Eli temporaryong nangatungdanan ingong hataas nga saserdote. Sa dihang giorganisar ni David ang pag-alagad sa templo, 8 sa 24 ka dibisyon sa saserdote maoy sa balay ni Itamar. (1Cr 24:1-6; 1Sa 14:3; 22:9; tan-awa ang HATAAS NGA SASERDOTE.) Ang mga anak nga lalaki ni Itamar gitala usab nga lakip sa mga balay sa amahan sa Israel human sa pagkadestiyero sa Babilonya.​—Esd 8:2.