EN-DOR

[lagmit, Tuboran (Tubod) sa Kaliwatan].

Usa ka siyudad sa kapatagan nga nahimutang sa teritoryo sa Isacar apan gipahat ngadto sa mga anak ni Manases. Ang mga Canaanhon didto wala sa bug-os papahawaa apan gipailalom sa pinugos nga trabaho. (Jos 17:11-13) Ang En-dor kasagarang gituohan nga mao ang Khirbet Safsafeh (Horvat Zafzafot), mga 11 km (7 mi) sa HS sa Nasaret.

Sa Salmo 83:​9, 10, ang En-dor gihisgotan labot sa kadaogan ni Jehova batok kang Sisera. Bisag wala hisgoti sa asoy sa gubat diha sa Maghuhukom kapitulo 4 ug 5, dayag nga kini nahimutang pipila lamang ka milya sa H sa Bukid sa Tabor, nga gikan didto milugsong ang kasundalohan ni Barak. (Huk 4:​6, 12) Didto usab sa katibuk-ang rehiyon sa Taanak ug Megido ug sa bul-oganang walog sa Kison, nga ang kasundalohan ni Sisera gipatibulaag sa milagrosong paagi. (Jos 17:11; Huk 5:19) Busa, dayag nga ang ubang bahin sa panaggubat nakaabot hangtod sa En-dor, ug ang salmista, nga sinati kaayo sa makasaysayanhon ug geograpikanhong mga detalye, nakaingon nga didto sa En-dor daghan sa nangalagiw nga mga Canaanhon ang gipamatay.

Ang En-dor mas nailado ingong dapit nga si Haring Saul mikonsulta sa usa ka “babayeng batid nga espiritista” sa wala pa mapildi ang Israel sa mga kamot sa mga Filistehanon.​—1Sa 28:7; 31:1-13.