TAANAK

Usa ka sakop nga siyudad sa Manases diha sa teritoryo sa Isacar (Jos 17:11; 1Cr 7:29) nga gihatag ngadto sa Kohatnong mga Levihanon. (Jos 21:​20, 25) Ubos sa pagpangulo ni Josue ang mga Israelinhon nagpildi sa hari sa Taanak. (Jos 12:​7, 21) Apan ang mga Manasesnon napakyas sa pagpapahawa sa mga Canaanhon gikan niini ug sa ubang mga siyudad. Hinuon, sa ngadtongadto kini nga mga Canaanhon gipailalom sa pinugos nga trabaho. (Huk 1:​27, 28) Sa panahon ni Maghuhukom Barak ang kasundalohan ni Jabin nga hari sa Hazor, nga gipangulohan sa iyang pangulo sa kasundalohan nga si Sisera, napildi didto sa Taanak. (Huk 5:19) Sa panahon sa paghari ni Solomon ang siyudad maoy sakop sa distrito nga gitudlo kang Baana, usa sa 12 ka luyoluyo nga nagdumala sa pagtaganag pagkaon alang sa panimalay sa hari. (1Ha 4:​7, 12) Ang arkeolohikanhong ebidensiya gikan sa Taanak ug ang kinulit diha sa usa ka paril sa templo didto sa Karnak nagpaila nga ang siyudad nailog ni Paraon Sisak sa dihang siya misulong sa Palestina sa ikalimang tuig sa paghari sa anak nga lalaki ug manununod ni Solomon nga si Rehoboam.​—2Cr 12:2-4.

Ang Taanak gituohan nga mao ang Tell Taʽanakh, mga 8 km (5 mi) sa HHS sa Megido ug nahimutang sa habagatang kiliran sa Patag sa Jezreel (ʽEmeq Yizreʽel). Ang dapit nag-okupar ug hinungdanong posisyon diha sa labing menos duha ka ruta sa negosyo, ang usa paingon sa Patag sa Aco ug ang lain paingon sa Patag sa Saron.