FESTO
[gikan sa Lat., Masadyaon; Malipayon].
Gobernador sa Romanhong lalawigan sa Judea human pabalika si Felix ngadto sa Roma. (Buh 24:27) Wala sa tino mahibaloi ang tuig niini nga pag-ilis sa mga gobernador; ang mga tinubdan sa impormasyon mao lamang ang Bibliya ug si Josephus, ug walay usa niini ang naghisgot kon tungod ba kini sa pagtudlo ni Nero. Dihay duha ka pundok sa mga kritiko, ang usa nagpamatuod nga miabot si Porcio Festo sa Judea niadtong 54 K.P., ug ang lain nag-ingon nga siya miabot niadtong 61. Ang mga historyador daw mipabor sa panahon tali sa 58 ug 61 K.P. Ang tuig nga 58 K.P., sumala sa gitumbok sa Analytical Concordance to the Bible ni Young (p. 342), lagmit nga mao gayod ang petsa sa paglingkod ni Festo ingong gobernador sa Judea.
Tulo ka adlaw human moabot si Festo didto sa Cesarea siya mipanaw ngadto sa Jerusalem, dayag nga aron masinati siya sa mga problema sa katawhan nga iyang mandoan. Si Pablo didto sa Cesarea, gibilin ingong binilanggo panahon sa administrasyon ni Felix. Ang pangulong mga saserdote sa mga Hudiyo ug ang kadagkoan sa mga tawo wala maglangan ug panahon sa paghangyo nga siya dad-on sa Jerusalem, kay sila nagtinguha sa pagbanhig ug sa pagpatay kaniya diha sa dalan. Apan, si Festo nakahukom sa paghusay pag-usab kang Pablo ug nagmando sa mga magsusumbong sa pag-atubang sa iyang lingkoranan-sa-paghukom didto sa Cesarea. Human sa “husay” kombinsido si Festo nga inosente si Pablo ug sa ulahi misugid ngadto kang Haring Agripa II: “Akong naila nga siya walay nahimong bisan unsa nga takos sa kamatayon.” (Buh 25:25) Una pa niana, kay “nagtinguhang makabaton sa pabor sa mga Hudiyo,” si Festo nangutana kon si Pablo moboluntaryo ba sa pag-adto sa Jerusalem aron husayon. (Buh 25:9) Apan, si Pablo mitubag: “Walay tawo nga makatugyan kanako ngadto kanila ingong pabor. Ako moapelar kang Cesar!”—Buh 25:11.
Karon si Festo nag-atubang na usab ug usa ka bag-ong problema. Sa pagsaysay kang Agripa nga siya nagsugo nga ipadala kini nga binilanggo ngadto sa Roma, apan walay mga sumbong nga ikasang-at batok kaniya, si Festo miingon: “Daw dili-makataronganon nga ipadala ko ang usa ka binilanggo ug dili usab ipaila ang mga sumbong batok kaniya.” (Buh 25:27) Si Agripa mitanyag sa paghusay kang Pablo aron masulbad ang suliran. Sa iyang depensa, si Pablo mihatag ug makapakombinsir ug puwersadong pahayag nga tungod niana si Festo nakaingon: “Ikaw nabuang, Pablo! Ang imong daghang nakat-onan maoy nakapabuang kanimo!” (Buh 26:24) Dayon si Pablo miliso ngadto kang Agripa uban ang usa ka kusganong pangdani, nga tungod niana mikomento si Agripa: “Sa mubong panahon makombinsir mo ako nga mahimong Kristohanon.” (Buh 26:28) Sa ulahi si Agripa miingon kang Festo: “Kining tawhana mabuhian unta kon wala pa siya moapelar kang Cesar.” Kini nga desisyon mao gayoy pagbuot sa Diyos, kay ang Ginoo nagbutyag na daan kang Pablo: “Magmaisogon! . . . usab ikaw kinahanglang magpamatuod sa Roma.”—Buh 23:11; 26:32.
Kon itandi sa malupigong administrasyon ni Felix, ang kang Festo giisip nga maoy maarang-arang sa katibuk-an. Iyang nasumpo ang teroristang mga bandido nga nailhang Mga Mamumuno, o Sicarii (magbabarawng mga lalaki), ug sa ubang mga paagi nagpatuman sa Romanhong balaod. Apan, ang usa ka mando ni Festo gibaliktad human kini giapelar ngadto sa Roma. Si Agripa nagtukod sa iyang lawak-kan-anan nga gikan niini malantaw ang nahimutangan sa sagradong templo, nga tungod niana ang mga Hudiyo nagtukod ug paril aron ang templo dili makita. Gimando ni Festo nga ang paril tangtangon tungod kay kini nakasalipod sa panan-aw sa kasundalohan, apan sa dihang giapelar ang kaso ngadto sa Roma ang paril gitugotan nga magpabilin. Si Festo namatay nga nangatungdanan pa ug gipulihan ni Albinus.