GETSEMANE

[Pug-anan sa Lana].

Lagmit usa ka tanaman sa mga kahoyng olibo nga adunay pug-anan aron sa pagpuga ug lana gikan sa mga olibo. Ang Getsemane nahimutang sa S sa Jerusalem, tabok sa Walog sa Kidron (Ju 18:1), diha sa o duol sa Bukid sa mga Olibo. (Luc 22:39) Dinhi si Jesu-Kristo sagad nakigtagbo sa iyang mga tinun-an. (Ju 18:2) Sa gabii sa Paskuwa niadtong 33 K.P., siya, uban sa iyang matinumanong mga tinun-an, miadto niini nga tanaman aron sa pag-ampo. Kay nakaplagan ug gibudhian ni Judas Iskariote, si Jesus gidakop didto sa usa ka armadong panon.​—Mat 26:36-56; Mar 14:32-52; Luc 22:39-53; Ju 18:1-12.

Ang tukmang nahimutangan sa tanaman sa Getsemane dili matino, tungod kay (sumala sa testimonya ni Josephus) ang tanang kahoy palibot sa Jerusalem gipuril sa panahon sa Romanhong paglikos niadtong 70 K.P. (The Jewish War, VI, 5-8 [i, 1]) Gituohan sa usa ka tradisyon nga ang Getsemane mao ang tanaman nga gikoralan sa mga Franciscano niadtong 1848. Misukod kini ug mga 46 por 43 m (150 por 140 p) ug nahimutang kini sa tiilan sa Bukid sa mga Olibo, sa misanga nga dalan sa K nga bakilid niini. Walo ka kahoyng olibo niana nga tanaman ang nagpabilin didto sulod na sa kasiglohan.