IGTUTUGSOK

Usa ka galamiton sa pagpanguma nga gama sa usa ka pudlos nga mga 2.5 m (8 p) ang gitas-on ug kasagarang gigamit sa pagdumbol ug sa paggiya sa mga torong baka kon magdaro. Ang usa ka tumoy sa pudlos gitaoran ug talinis nga metal aron sa pagtusok sa hayop, ug ang pikas tumoy gitaoran ug usa ka lapad nga samag-silsil nga ohas nga gamiton sa pagkuha sa hugaw ug sa lapok gikan sa punta sa daro o sa pagtangtang sa mga gamot ug mga tunok gikan niini.

Ang “usa ka igtutugsok sa baka” gigamit ni Samgar sa pagpatay sa 600 ka Filistehanon. (Huk 3:31) Ang Hebreohanong pulong dinhi nga gihubad nga “igtutugsok” (mal·madhʹ) naggikan sa lintunganayng pulong nga la·madhʹ (tuon; tudlo).

Ang rekord sa Bibliya naghisgot nga sa dihang ang mga Filistehanon naggahom sa mga Israelinhon panahon sa paghari ni Saul, ang mga Israelinhon wala tugoti nga makabaton ug mga mananalsal ug busa napugos sa paglugsong ngadto sa mga Filistehanon aron sa pagpabaid sa ilang mga galamiton sa pagpanguma ug aron sa pagpataod sa ilang mga igtutugsok (lagmit ang mga tumoy nga metal) sa baka.​—1Sa 13:19-21.

Ang igtutugsok gitandi sa mga pulong sa usa ka tawong maalamon, mga pulong nga magtukmod sa tigpatalinghog nga molihok kaharmonya sa kaalam nga nadunggan. (Ecc 12:11) Ang mahulagwayong ekspresyon nga “pagpatid batok sa mga igtutugsok” naggikan sa aksiyon sa gahian nga torong baka nga mosuki sa mga pagtusok sa igtutugsok pinaagi sa pagpatid niini, nga makasamad hinuon niini. Busa, kini nga ekspresyon nagtumong sa pagsuki o sa pagrebelde batok sa lehitimong awtoridad o sa usa ka kahimtang nga dili na mausab, nga nagbuhat niana sa ikadaot mismo sa usa. Mao gayod kini ang gihimo ni Saulo sa wala pa mahimong usa ka Kristohanon, pinaagi sa pagpakig-away batok sa mga sumusunod ni Jesu-Kristo, kinsa gipaluyohan ni Jehova nga Diyos.​—Buh 26:14; itandi ang Buh 5:​38, 39.