HOPRA

[gikan sa Ehiptohanon, nga nagkahulogang “Ang Kasingkasing ni Ra [ang diyos-adlaw] Milahutay”].

Sa Gregong Septuagint (sa Jer 51:​30, nga katumbas sa 44:30 sa kadaghanang bersiyon), siya gitawag nga Ou·a·phreʹ. Si Paraon Hopra gitawag ug Apries ni Herodotus. Gituohan nga si Hopra naghari sulod sa 19 ka tuig. Apan, sumala ni Herodotus (II, 161), siya naghari sulod sa 25 ka tuig.

Human mokalagiw ang mga Hudiyo ngadto sa Ehipto niadtong 607 W.K.P., si Jehova nag-ingon pinaagi sa baba ni Jeremias: “Ania, akong itugyan si Paraon Hopra, ang hari sa Ehipto, ngadto sa kamot sa iyang mga kaaway ug ngadto sa kamot niadtong nagtinguha sa iyang kalag.” (Jer 44:​1, 26, 30) Kini mahimong usa ka ilhanan sa nagsingabot nga katalagman nga modangat sa mga Hudiyo nga nanimuyo sa Ehipto. (Jer 44:29) Sumala ni Herodotus (II, 161-169), si Hopra (Apries) mihimog usa ka makatalagmanong panaw ngadto sa Cirene aron tabangan ang mga taga-Libya batok sa mga Grego sa ikaunom nga siglo W.K.P. Ang kasundalohan ni Hopra mialsa batok kaniya ug nagpahiluna kang Ahmose II (Amasis) ingong karibal nga hari. Bisan pa niana, si Hopra hilabihan ka arogante nga gani siya “naghunahunang bisan ang usa ka diyos dili makahimo sa pagtangtang kaniya gikan sa iyang trono.” Hinunoa, siya gidala ingong binilanggo ug sa ulahi gipatay pinaagig pagtuok.