IDO

[1-5: pinamubo sa Adaia, nga nagkahulogang “Si Jehova Nagdayandayan [sa tag-iya sa ngalan]”].

1. Anak nga lalaki ni Joa; usa ka Levihanon sa banay ni Gersom.​—1Cr 6:19-21.

2. Amahan ni Ahinadab, ang usa nga nag-alagad ingong luyoluyo nga tigtaganag pagkaon ni Solomon didto sa Mahanaim.​—1Ha 4:​7, 14.

3. Usa ka bisyonaryo kansang mga sinulat gikonsulta sa tighipos sa Mga Cronicas alang sa impormasyon maylabot sa mga kalihokan ni Haring Solomon, Rehoboam, ug Abias. Ang mga sinulat ni Ido gihisgotan ingong usa ka “kabatbatan,” usa ka “komentaryo,” o usa ka “midrash.”​—2Cr 9:29; 12:15; 13:​22, ftn sa Rbi8.

4. Amahan ni Berekias ug apohan sa manalagna nga si Zacarias. (Esd 5:1; 6:14; Zac 1:​1, 7) Kini nga Ido lagmit mao ra ang Num. 5.

5. Usa ka saserdoteng gitala nga lakip niadtong namalik sa Jerusalem kauban ni Zorobabel niadtong 537 W.K.P. Sa mga adlaw sa Hataas nga Saserdoteng si Joiakim ang balay sa amahan ni Ido gipangulohan ni Zacarias. (Neh 12:​1, 4, 12, 16) Siya lagmit mao ra ang Num. 4.

6. [lagmit gikan sa lintunganayng pulong nga nagkahulogang “dayeg”; o gikan sa laing lintunganayng pulong nga nagkahulogang “hibalo”]. Anak nga lalaki sa usa ka Zacarias; prinsipe sa katunga sa tribo ni Manases didto sa Gilead sa panahon ni Haring David.​—1Cr 27:​21, 22.

7. Pangulo sa mga Netinim nga mga ulipon sa templo nga nanimuyo sa Casipia, 220 kanila ang miuban kang Esdras paingon sa Jerusalem niadtong 468 W.K.P.​—Esd 8:​17, 20.