BISYONARYO

Usa ka tawo nga nakakita o miingong nakakita ug mga panan-awon gikan sa Diyos bahin sa mga tinago o umaabot nga mga butang. Ang Hebreohanong pulong alang sa “bisyonaryo” mao ang cho·zehʹ, gikan sa cha·zahʹ, nga nagkahulogang “makita; panan-awon.” Ang cha·zahʹ ug ang mga pulong nga naporma gikan niini gigamit sa pagtumong sa pagkakita ug mga panan-awon.​—Num 24:4; Isa 1:1; 21:2; 22:1; Eze 13:7; Dan 8:1; tan-awa ang TIGPATIN-AW SA PANAN-AWON.

Ang pipila ka bisyonaryo maoy mini ug gipakigbatokan sa Diyos. (Isa 29:10; Miq 3:7) Ang uban maoy pinadala ni Jehova ug nagsulti pinaagi sa iyang ngalan. (2Ha 17:13; 2Cr 33:18) Ang ubay-ubayng mga tawo, sama kang Heman, Ido, Hanani, Gad, Asap, Jedutun, ug Amos gitawag ug “bisyonaryo.” (1Cr 25:5; 2Cr 12:15; 19:2; 29:​25, 30; 35:15; Am 7:12) Ang pipila, sama kang Gad ug Ido, nagtala sa ilang mga panan-awon o nagsulat ug ubang mga asoy. (1Cr 29:29; 2Cr 9:29; 33:19) Dili tanan sa mga manalagna ni Jehova maoy mga bisyonaryo. Apan, si Gad gitawag nga “manalagna” ug “bisyonaryo ni David,” lagmit tungod kay ang pipila sa mga mensahe nga iyang nadawat gikan sa Diyos gihatag pinaagig mga panan-awon nga naundan sa instruksiyon o tambag sa Diyos alang kang Haring David.​—2Sa 24:11; 1Cr 21:9.