GARING

Ang pution nga mga tango sa elepante, hippopotamus, walrus, ug sa ubang mga hayop. Bisan tuod kini gahi, ug mga tulo ug tunga ka pilo nga mas bug-at kay sa gipauga nga kahoyng sedro, kini dali rang mabawog ug sayon rang kulitan ug pormahon. Tungod kay kini pinog grano, kini hamis ug sinaw ug lig-on kaayo. Ang nagsapawsapaw nga mga lut-od sa dentin (pangunang sangkap sa ngipon), nga nagsal-angsal-ang ang mga kolor, dugang nakaamot sa talagsaong katahom ug pagkamapuslanon niini. Ang “garing” gipaila diha sa Hebreohanon pinaagi sa mga pulong nga shen (sa literal, ngipon) ug shen·hab·bimʹ (gihubad nga “mga ngipon sa mga elepante” diha sa Gregong Septuagint). Ang Gregong termino nga e·le·phanʹti·nos nagkahulogang “gama sa garing.”

Ang garing gilangkit sa mga luho sa kinabuhi​—belyas artes, maanindot nga mga muwebles, ug bililhong mga bahandi. Ang mga barko ni Solomon, kausa sa matag tulo ka tuig, nagdala ug daghan kaayong mga garing gikan sa halayong mga dapit. (1Ha 10:22; 2Cr 9:21) Kay haom sa iyang himaya ug kabantog, si Solomon “naghimo ug usa ka dakong trono nga garing ug naghaklap niini ug dalisay nga bulawan.” (1Ha 10:18; 2Cr 9:17) Ang Mga Salmo naghisgot sa “dakong palasyo nga garing” may labot sa kinuldasan nga mga tulonggon. (Sal 45:8) Diha sa maanindot nga Awit ni Solomon ang magsusulat migamit sa garing ingong usa ka metapora ug simile (pagtandi) aron ipahayag ang katahom: “Ang iyang tiyan usa ka palid sa garing nga tinabonan sa mga sapiro,” “Ang imong liog sama sa usa ka garing nga torre.” (Aw 5:14; 7:4) Si Haring Ahab usab nagtukod ug usa ka palasyo ginamit ang mahalon nga garing, nga naghimo niini nga usa gayod ka “balay nga garing.” (1Ha 22:39) Sa mga adlaw ni Amos ang mga balay ug mga higdaanan maoy gama sa garing. (Am 3:15; 6:4) Ang arkeolohikanhong mga kaplag nagpamatuod nga kaylap kaayong gigamit ang garing sa nasod sa Israel ug sa mga silingan niini.

Ang Ehipto usab migamit niining kinaiyanhon nga “plastik” sa paggamag mga kagamitan sama sa mga sudlay, gunitanan sa paypay, plato, sudlanan sa panghaplas, tiil sa silya, samag-damahan nga mga papan, gagmayng mga estatwa, ug kinulit nga mga buhat sa arte. Diha sa dakong komersiyo niini sa dagat, ang mga dulong sa mga barko sa siyudad sa Tiro gihal-opan ug garing. Ang garing gitala usab nga lakip sa mahalong mga butang sa karaang mga magpapatigayon sa Tiro, ug lakip usab kini sa mga baligya sa “nagapanawng mga magpapatigayon sa yuta” nga nanghilak tungod sa pagkapukan sa Dakong Babilonya.​—Eze 27:​6, 15; Pin 18:​11, 12.