JEHUDI

[Usa ka Hudiyo; Kang (Iya ni) Juda].

Usa ka opisyal ni Haring Jehoiakim nga gisugo sa mga prinsipe sa Juda nga dad-on si Baruk kanila dala ang linukot nga basahon ni Jeremias. Sa dihang sa ulahi si Jehudi nagbasa sa samang linukot nga basahon ngadto kang Jehoiakim, ang hari nagputolputol niini ug nagsunog niini nga tagsatagsa, hangtod ang tibuok linukot nga basahon naut-ot sa kalayo.​—Jer 36:​14, 21-23, 27, 32.

Si Jehudi maoy apo-sa-tuhod ni Cusi. (Jer 36:14) Ang iyang ngalan ug ang ngalan sa iyang katigulangan gituohan sa pipila nga nagpasabot nga siya gipakatawo nga dili usa ka Hudiyo, kondili usa ka kinabig, kay ang ngalan sa iyang apohan-sa-tuhod nagpaila nga ang iyang banay naggikan kang Cus, o sa Etiopia. Ugaling, ang mga kaliwatan tali kanila sagad may mga ngalang Hudiyo (si Netanias nga iyang amahan ug si Selemias nga iyang apohan), ug bisan ang ngalang Cusi makita sa ubang teksto ingong personal nga ngalan sa usa ka lumad nga Hudiyo. (Sof 1:1) Busa ang Jehudi lagmit gayod nga usa lamang ka personal nga ngalan sukad sa pagkatawo ug dili usa ka ngalan nga unang nabatonan ingong usa ka kinabig.