LINGKORANAN-SA-PAGHUKOM

Sagad nga usa ka habog nga plataporma diha sa gawas ug may mga ang-ang, gikan niini ang naglingkod nga mga opisyal makasulti ngadto sa mga panon sa katawhan ug makapahibalo sa ilang mga desisyon. (Mat 27:19; Ju 19:13; Buh 12:21; 25:​6, 10, 17) Ang giisip sa pipila ingong mao ang lingkoranan-sa-paghukom (gitawag nga Bema) didto sa Corinto, diin si Pablo miatubang kang Galio, maoy hinimo sa puti ug asul nga marmol. (Buh 18:​1, 12, 16, 17) Sa kiliran niini may duha ka hulatanang mga lawak nga mosayko ang disenyo sa mga salog ug may mga lingkoranan nga marmol.

Gitugyan ni Jehova nga Diyos ang tanang paghukom ngadto sa iyang Anak (Ju 5:​22, 27), ug busa ang tanan kinahanglang moatubang sa “lingkoranan-sa-paghukom ni Kristo.” (2Co 5:10) Kini husto usab nga tawgong “lingkoranan-sa-paghukom sa Diyos” sanglit si Jehova mao ang Tigmugna niini nga kahikayan ug nagahukom pinaagi sa iyang Anak.​—Rom 14:10.