KADMONIHANON

[gikan sa lintunganayng pulong nga nagkahulogang “sidlakan”].

Usa ka katawhan nga gitala lakip sa ubang mga nasod kansang kayutaan gisaad ni Jehova ngadto sa binhi ni Abram. (Gen 15:18-21) Sila dayag nga usa ka tigbuhig kahayopan o tigbalhinbalhin nga tribo, sama sa mga Kenihanon ug mga Kenizihanon nga gihisgotan uban kanila. (Gen 15:19) Ang tukmang nahimutangan sa ilang teritoryo dili matino, bisan tuod gituohan nga sila nanimuyo sa Siryanhong desyerto tali sa Palestina-Sirya ug sa Suba sa Euprates.

Ang Hebreohanong ngalan niini nga katawhan (qadh·moh·niʹ) kaamgid sa adhetibo nga qadh·moh·niʹ (sidlakan, Eze 47:18); busa ang pipila nagtuo nga lagmit kini sa yano nagkahulogang “mga taga-Sidlakan.” (Huk 8:10) Apan, ang kamatuoran nga kining Hebreohanong termino gigamit ingong usa ka ngalan diha sa Genesis 15:19 nagpakita nga kini mahimong magtumong sa usa ka espesipikong tribo.