KERIOT

[Mga Lungsod].

Usa ka dapit nga gihisgotan sa duha ka tagna batok sa Moab. (Jer 48:24; Am 2:2) Ang kahulogan niining ngalana lagmit nagpakitang ang siyudad gilangkoban sa ubay-ubayng gagmay nga mga lungsod. Ang tukmang nahimutangan sa Keriot dili matino. Gipangagpas sa pipila ka eskolar nga kini mao ang Saliya, usa ka dapit nga mga 16 km (10 mi) sa SHS sa Dibon ug A sa Arnon. Ang uban nagtuo nga ang Keriot mao tingali ang Ar, sa H sa Arnon. Kini nga pagtuo daw gipaluyohan tungod kay ang Ar ug ang Keriot, bisan tuod giisip ingong pangunang mga siyudad (itandi ang Am 2:1-3; Deu 2:​9, 18), dili makita nga magkauban diha sa mga talaan sa Moabihanong mga lungsod.​—Itandi ang Isa 15 ug 16; Jer 48.

Bisan tuod ang Bato sa Moab wala maghisgot bahin sa nahimutangan sa Keriot, kini nagpakita nga ang diyos nga si Kemos dunay usa ka sangtuwaryo didto.