LIBNA

[gikan sa lintunganayng pulong nga nagkahulogang “puti”; o, lagmit, “kahoyng estorake”].

1. Usa ka kampo sa mga Israelinhon didto sa kamingawan. Ang nahimutangan niini wala mahibaloi.​—Num 33:​20, 21.

2. Usa ka harianong siyudad sa Canaan nga nailog ni Josue una pa sa pagsakop sa Lakis. (Jos 10:29-32, 39; 12:15) Ang Libna maoy usa sa mga siyudad sa teritoryo sa Juda nga gihatag ngadto sa “mga anak nga lalaki ni Aaron.” (Jos 15:​21, 42; 21:13; 1Cr 6:57) Kasiglohan sa ulahi ang ugangang lalaki ni Haring Josias mipuyo didto.​—2Ha 23:31; 24:18; Jer 52:1.

Sa panahon sa pag-alsa sa Edom niadtong ikanapulong siglo W.K.P., ang Libna mirebelde usab batok kang Haring Jehoram sa Juda. (2Ha 8:22; 2Cr 21:10) Niadtong 732 W.K.P., ang kasundalohan ni Haring Senakerib sa Asirya mibalhin gikan sa Lakis ngadto sa Libna. Nagpadala siyag pundok sa mga sundalo gikan sa Lakis aron sa paghulga sa Jerusalem. Samtang didto sa Libna, ang mga Asiryanhon nakadawat ug mga taho nga si Tirhaka nga hari sa Etiopia buot makiggubat kanila. Busa, aron mosurender ang Jerusalem, si Senakerib nagpadalag mga mensahero sa ikaduhang higayon nga nagdalag mga sulat aron sa paghadlok kang Ezequias nga hari sa Juda. Human niadto ang manulonda ni Jehova mipatay sa 185,000 ka Asiryanhong mga sundalo, nga lagmit nagkampo pa gihapon duol sa Libna.​—2Ha 19:8-35; Isa 37:8-36.

Ang Tell es-Safi gituohan nga lagmit mao ang karaang Libna. Bisan pa niana, sanglit ang gibug-aton sa ebidensiya nagpunting sa Tell es-Safi nga mao ang Gat, ang modernong mga eskolar mipalabi sa pagtuo nga ang Libna mao ang Tell Bornat (Tel Burena), mga 8 km (5 mi) sa AAS sa Lakis.