KILAT

Ang dan-ag kaayong mga kidlap sa kahayag nga namugna tungod sa migulang koryente diha sa atmospera tali sa mga panganod o tali sa panganod ug sa yuta. Kining katingalahang hitabo nga inubanan ug dalugdog sagad nga makita sa Israel sa ulanong mga panahon sa tingpamulak ug sa tinghunlak, nga subsob mahitabo ilabina panahon sa bugnawng mga bulan sa Nobyembre o Disyembre.

Ingong Maglalalang sa mga elemento nga magpahinabog kilat, si Jehova mao ang tinubdan niini. (Job 37:​3, 11) Siya usab makakontrolar niini ug lagmit migamit ug kilat ug mga butang nga susama niini aron sa pagluwas sa iyang mga alagad gikan sa ilang mga kaaway ingon man sa pagpahamtang sa iyang mga paghukom. (2Sa 22:​1, 15; Sal 18:14; 77:16-20; Zac 9:14; itandi ang Job 36:32; Sal 97:4; 144:6.) Busa, haom nga ang mga kilat nalangkit sa trono sa Diyos (Pin 4:5; itandi ang Pin 11:19) ingon man labot sa mga kapahayagan sa iyang kasuko (Pin 8:5; 16:18) ug mahulagwayong gihubit ingong nagtaho sa kalamposan sa ilang buluhaton. (Job 38:35) Sa Bukid sa Sinai, ang katingalahang pisikal nga mga pagpadayag sa presensiya sa Diyos giubanan ug mga pangidlap sa kilat.​—Ex 19:16; 20:18.

Ang kilat (Heb., ba·raqʹ) mahulagwayong gigamit sa paghawas sa mga kidlap sa gipasinaw nga metal. (Deu 32:41 ftn sa Rbi8; Eze 21:10 ftn sa Rbi8; Nah 3:3; Hab 3:11) Diha sa Nahum 2:4 mahimong ang mga pangidlap o ang katulin sa mga karo sa kaaway diha sa kadalanan sa Nineve mao ang gipasabot sa mga pulong, “Sila nagapanagan sama sa kilat.” Ug ang silaw nga mga nawong o dagway sa mga manulonda gitandi sa kilat.​—Dan 10:​5, 6; Mat 28:​2, 3; tan-awa usab ang Eze 1:14.

Gipakita ni Kristo Jesus nga ang iyang presensiya dili matago, maingon nga imposibleng matago ang kilat nga “mokilab gikan sa sidlakang mga bahin ug modan-ag hangtod sa kasadpang mga bahin.” (Mat 24:23-27; Luc 17:20-24) Una pa niana, sa dihang ang 70 ka tinun-an nga iyang gipadala mibalik nga nagtaho nga bisan ang mga demonyo nagpasakop kanila pinaagi sa paggamit sa iyang ngalan, gihisgotan ni Jesus nga ang umaabot nga pagpalagpot kang Satanas gikan sa langit seguradong mahitabo, nga nag-ingon: “Nagsugod na ako pagkakita kang Satanas nga nahulog na ingon sa kilat gikan sa langit.”​—Luc 10:​1, 17, 18.

Sa Lucas 11:36 ang Gregong pulong alang sa kilat (a·stra·peʹ) nagtumong sa kahayag o dan-ag sa lampara.