LISANIAS

[usa ka gikombinar nga pulong nga gikan sa mga lintunganayng pulong nga nagkahulogang “badbad; nabadbad” ug “kaguol; kasakit”].

Ang magmamando sa distrito, o tetrarka, sa Abilinia sa dihang si Juan nga Tigbawtismo nagsugod sa iyang ministeryo (29 K.P.), sa panahon sa ika-15 nga tuig nga pagmando ni Tiberio Cesar. (Luc 3:1) Ang Romanhong tetrarkiya sa Abilinia may kaulohan niini didto sa Abila, duol sa Damasco sa Sirya. Usa ka inskripsiyon sukad pa sa panahon ni Tiberio Cesar ang nakaplagan didto nga naghandom sa pagpahinungod sa templo pinaagi sa usa ka tawong pinagawas nga “si Lisanias nga tetrarka.” (Corpus Inscriptionum Graecarum, Tomo 3, Num. 4521) Tungod kay si Josephus naghisgot sa usa ka Lisanias nga gipatay sa mga 34 W.K.P. ni Mark Antony tungod sa pagsulsol ni Cleopatra, gisaway sa pipila nga dili-tukma ang rekord ni Lucas. (Jewish Antiquities, XV, 92 [iv, 1]) Apan, si Lucas wala masayop, kay ang Lisanias nga iyang gihisgotan dili parehong tawo sa unang Lisanias (nga anak nga lalaki ni Ptolemy) kinsa, sa wala pa patya, nagmando, dili sa Abilinia, kondili sa duol nga dapit sa Chalcis, ug kinsa wala tawga nga tetrarka.