MEPIBOSET

1. Usa sa duha ka anak nga lalaki ni Haring Saul pinaagi kang Rizpa nga anak nga babaye ni Aia. (2Sa 21:8) Siya maoy usa sa pito ka kaliwat ni Saul nga gitugyan ni David ngadto sa mga Gabaonhon isip bayad tungod sa pagsulay ni Saul sa pagpuo kanila. (Tan-awa ang GABAON, GABAONHON.) Giladlad sa mga Gabaonhon si Mepiboset ug ang ubang unom ka membro sa panimalay ni Saul “didto ibabaw sa bukid atubangan ni Jehova,” human sila pamatya “sa unang mga adlaw sa ting-ani, sa sinugdan sa pag-ani sa sebada.” (Itandi ang Num 25:4.) Apan gibantayan sila ni Rizpa aron walay makaduol nga mga langgam ug ihalas nga mga mananap, ug sa ulahi gipatigom ug gipalubong ni David ang ilang mga bukog ipon sa mga bukog ni Saul ug Jonatan sa lubnganan ni Kis.​—2Sa 21:1-14.

2. Anak nga lalaki ni Jonatan; apo ni Haring Saul. Sa dihang ang taho bahin sa kamatayon ni Saul ug Jonatan nakaabot gikan sa Jezreel, ang singko-anyos nga batang si Mepiboset gidala sa iyang iwa ug mikalagiw sila tungod sa kalisang. Niadto nga higayon, si Mepiboset “nahulog ug nabakol” ang duha ka tiil. (2Sa 4:4) Sulod sa pipila ka tuig human niadto, si Mepiboset nagpuyo sa balay ni Makir nga anak nga lalaki ni Amiel sa Lo-debar. Nasayran kini ni David gikan kang Ziba, nga kanhing sulugoon sa balay ni Saul. Walay duhaduha nga nahinumdom sa iyang pakigsaad kang Jonatan (1Sa 20:12-17, 42), buot ni David nga magpakitag mahigugmaong-kalulot ngadto kang bisan kinsa nga “nahibilin sa balay ni Saul.” Gidala si Mepiboset sa atubangan ni David, ug sa dihang gisaysay sa hari nga buot niyang magpakitag mahigugmaong-kalulot kang Mepiboset pinaagi sa pag-uli kaniya sa “tanang yuta ni Saul” ug nga siya ‘magakaon ug tinapay sa iyang lamesa,’ si Mepiboset mapainubsanong mitubag: “Unsa ba ang imong sulugoon, nga ikaw naglingi man sa patay nga iro sama kanako?” Hinunoa, agig pagtuman sa determinasyon ni David niining butanga, si Ziba ug ang tanan nga nagpuyo sa iyang balay (lakip ang 15 ka anak nga lalaki ug 20 ka sulugoon) nahimong mga sulugoon ni Mepiboset, kinsa gihatagan sa katigayonan ni Saul. Human niadto siya mipuyo sa Jerusalem ug mikaon kanunay diha sa lamesa sa hari.​—2Sa 9.

Sa dihang mikalagiw si David gikan sa Jerusalem tungod sa pakigkunsabo ni Absalom batok kaniya, gisugat siya ni Ziba, kinsa nagtagana kaniyag mga pagkaon. Sa pagtubag sa mga pangutana ni David sa pagpakisayod bahin kang Mepiboset, si Ziba miingon: “Atua siya nagpabilin sa Jerusalem; kay siya miingon, ‘Karong adlawa ang balay sa Israel magauli kanako sa harianong pagmando sa akong amahan.’” Tungod niana, ang hari misulti kang Ziba: “Tan-awa! Imo na ang tanan nga gipanag-iya ni Mepiboset.” (2Sa 16:1-4) Gisugat ni Mepiboset si David sa paghibalik sa hari sa Jerusalem, ug ang asoy nag-ingon nga “wala niya maatiman ang iyang mga tiil ni maatiman niya ang iyang bigote ni malabhan niya ang iyang mga besti sukad sa adlaw nga mibiya ang hari hangtod sa adlaw nga miabot siya sa kalinaw.” Sa dihang nangutana si David kon nganong wala mouban si Mepiboset kaniya, gisaysay ni Mepiboset nga ang iyang sulugoon naglimbong kaniya ug miingon usab: “Busa siya nagbutangbutang sa imong alagad atubangan sa akong ginoo nga hari. Apan ang akong ginoo nga hari sama sa usa ka manulonda sa matuod nga Diyos” (buot ingnon, iya rang masayran kon unsa ang tinuod). Dayag nga nakita ni David ang pagkawalay-sala ni Mepiboset, ug gibag-o niya ang una niyang sugo pinaagi sa pag-ingon: “Ikaw ug si Ziba magbahin sa yuta.” Niini mitubag si Mepiboset: “Ipakuha kaniya bisan ang tanan, karon nga ang akong ginoo nga hari miabot na sa iyang balay diha sa kalinaw.”​—2Sa 19:24-30; itandi ang Pr 18:17; 25:8-10.

Sa dihang ang mga Gabaonhon nagtinguha sa pagpatay sa mga kaliwat ni Saul ingong bayad sa daotang gihimo sa hari batok kanila, si David naluoy kang Mepiboset tungod sa panumpa kang Jehova nga gihimo tali ni David ug Jonatan ug nagluwas kang Mepiboset. (2Sa 21:​7, 8) Ang Kasulatan wala na maghatag ug dugang impormasyon bahin kang Mepiboset, bisan tuod nga ang banay ni Saul nagpadayon pa sa ulahing kaliwatan pinaagi sa anak nga lalaki ni Mepiboset nga si Mica (Miqueas). (2Sa 9:12; 1Cr 9:39-44) Dayag nga si Mepiboset ginganlan usab ug Merib-baal, ingon sa gipakita sa 1 Cronicas 8:34 ug 9:40.