ZIBA

Ang sulugoon sa panimalay ni Saul nga gikan kaniya nasayran ni David ang mahitungod sa bakol nga anak nga lalaki ni Jonatan nga si Mepiboset. Gidala ni David si Mepiboset ngadto sa Jerusalem ug gitudlo si Ziba, ang iyang 15 ka anak nga lalaki, ug ang iyang 20 ka sulugoon sa pag-atiman sa panulondon ni Mepiboset. (2Sa 9:2-12 [Ang paghisgot sa “akong lamesa” sa bersikulo 11 gihunahuna sa kadaghanan nga usa ka sayop sa magkokopya imbes nga “lamesa ni David”; ang laing posibilidad mao nga si Ziba lagmit nagsubli sa eksaktong mga pulong ni David.]) Sa dihang mikalagiw si David gikan sa Jerusalem gumikan sa pag-alsa ni Absalom, si Ziba nagdala kaniyag gikinahanglan kaayong mga suplay nga pagkaon ug mga hayop. Ugaling, iyang gibilin si Mepiboset, bisan pag gusto niyang mokuyog, ug giingnan si David nga si Mepiboset kinabubut-ong nagpabilin sa Jerusalem kay naglaom nga mabawi ang gingharian alang sa banay ni Saul. Ingong sanong, nga wala mohimog dugang pakisusi niining butanga, gibalhin ni David ang katigayonan ni Mepiboset ngadto kang Ziba.​—2Sa 16:1-4.

Sa dihang mibalik si David human masumpo ang pag-alsa, si Ziba lakip sa unang mipahalipay sa hari. Unya si Mepiboset misugat kang David, mihangop kaniya, ug nagpahibalo kaniya sa gihimong paglingla ug pagbutangbutang ni Ziba. Tungod niini nga mga panghitabo, si David mihukom nga bahinon ang katigayonan tali kang Mepiboset ug Ziba. Hinunoa, si Mepiboset miingon: “Ipakuha kaniya [kang Ziba] bisan ang tanan, karon nga ang akong ginoo nga hari miabot na sa iyang balay diha sa kalinaw.”​—2Sa 19:​17, 24-30.