MEROM, KATUBIGAN SA

[Hataas (Binayaw) nga Dapit].

Dinhi nagkampo ang magkaabin nga kasundalohan sa Canaan ubos sa pagmando ni Jabin nga hari sa Hazor sa wala pa sila mapildi ni Josue. Lagmit sa unang higayon giatubang sa mga Israelinhon ang mga Canaanhon nga nasangkapan sa mga kabayo ug mga karo, ingon sa gipakita sa mga instruksiyon sa Diyos nga nadawat ni Josue niadtong higayona bahin sa pagsunog sa mga karo ug sa pagkiting sa mga kabayo.​—Jos 11:1-9.

Ingon sa gipatin-aw ni Y. Aharoni, “Ang ‘katubigan sa Merom’ mao gayod ang tinubdan sa tubig sa siyudad sa Merom duol sa gitigoman sa Canaanhong kasundalohan. Ang Merom nailhan gikan sa ikaduhang-milenyo nga Ehiptohanong mga rekord . . . ug gikan sa asoy ni Tiglat-pileser III bahin sa iyang pagpakiggubat sa Galilea . . . Gidawat sa kadaghanan nga ang Merom mao ang Meirun sa tiilan sa Jebel Jarmaq, apan kay walay bungdo niini nga dapit nga mohaom sa kahubitan sa Merom, mas gipalabi ang usa ka lokasyon nga halayo pag diyutay dapit sa amihanan. Ang ngalan niini lagmit napreserbar diha sa ngalan sa Jebel Marun ug sa Marun er-Ras, ug mahimo natong isipon nga kini mao ang Tell el-Khirbeh, usa sa dakong Canaanhong mga bungdo sa habagatang bahin sa Ibabawng Galilea sa Canaan. Gikan sa Hazor ang duha ka gituohang mga lokasyon maoy mga pito ngadto sa walo ka milya ang gilay-on kon deretso ang panaw.”​—The Land of the Bible, gihubad ug giedit ni A. Rainey, 1979, pp. 225, 226.