MIRTO

[Heb., hadhasʹ].

Ang mirto (Myrtus communis) motubo ingong usa ka kahoykahoy o kaha usa ka kahoy ug komon diha sa Israel ug Lebanon, nga motubog maayo diha sa batoon nga yuta. Kini moabot sa gitas-ong 9 m (30 p) apan sagad makaplagan ingong usa ka kahoykahoy nga may gitas-ong 2 hangtod sa 3 m (7 hangtod sa 10 p). Ingong usa ka evergreen o kanunayng may mga dahon nga tanom, kini daghag sanga ug may baga, sinawon, lugom-berde nga mga dahon; kini mamulak nga pinungpong sa humot ug puting mga bulak nga mahimong asul-itom nga mga bunga. Halos ang tibuok tanom may humot nga lana nga gigamit sa mga pahumot. Ang mga bunga, gawas nga humot, mahimong kan-on. Ang mirto makaplagan karong adlawa ilabina sa Ibabaw nga Galilea ug sa walog sa Jordan, apan kini usab nanubo diha sa Jerusalem, ingon sa pagtubo niini sa panahon nga nakakitag panan-awon si Zacarias nga natala diha sa Zacarias 1:8-11, 16.

Ang humot nga mga sanga sa mirto gigamit kauban sa mga sanga sa ubang mga kahoy aron sa pag-atop sa temporaryong mga payag sa gawas o mga balongbalong nga gigamit sa mga Hebreohanon panahon sa Pista sa mga Balongbalong. (Neh 8:​14, 15) Sa mga tagna sa pagpasig-uli, ang mahumot ug matahom nga kahoyng mirto gitagna nga motubo puli sa dapawong tanom ug kini motubo gani bisan sa kamingawan.​—Isa 41:19; 55:13.

Ang Hebreohanong ngalan ni Ester nga asawa sa Persianhon nga si Haring Ahasuero maoy Hadassa, nga nagkahulogang “Mirto.”​—Est 2:7.