PUKOT

Sa katibuk-an, usa kini ka materyales nga ginama sa linubid nga hilo, lambo, o pisi, ug gilala ingong mga ginambat. Ang mga pukot gigamit sa pagsikop o pagdakop sa mga isda (Ecc 9:12; Isa 19:8; Mat 4:18-21), mga langgam (Pr 1:17), ug ubang mga hayop (Isa 51:20). Lakip sa pangunang mga materyales nga gigamit sa paghimo niini mao ang lino, lanot sa palma, ug papiro.

Apan, ang mga pukot nga metal gigamit sa lahi gayod nga mga katuyoan. Ang mga pukot o ginambat nga gama sa tumbaga gigamit ingong dayandayan alang sa mga ulo-ulo sa mga haligi sa templo nga gitawag ug Jakin ug Boaz (tan-awa ang ULO-ULO), ug usa ka pukot o rehasrehas nga tumbaga ang nagsilbing parilya alang sa halaran.​—Ex 27:​4, 5; 38:4; 1Ha 7:16-18, 41, 42; Jer 52:​22, 23.

Mahulagwayong Paggamit. Ang “pukot” sagad gigamit nga mahulagwayon diha sa Bibliya aron sa paghawas sa mga paagi sa paglit-ag sa uban​—sa paglibot kanila ug sa pagbihag o sa pagpadangat ug kadaotan nganha kanila. (Job 18:8; 19:6; Sal 66:11; Lam 1:13; Eze 12:13; 17:20; 19:8; 32:3; Os 5:1; 7:12; Miq 7:2) Ang mga paagi nga gigamit sa mga Caldeanhon aron sa pagsakop ug mga nasod samtang sila nagpalapad sa ilang dominyo gipakasama sa usa ka baling. (Hab 1:​6, 15-17) Dugang pa, ang pag-ulog-ulog ug ang kasingkasing sa usa ka imoral nga babaye nga nagalaraw ug daotan gipakasama sa mga pukot. (Pr 29:5; Ecc 7:26) Gipahayag sa salmista ang pagsalig nga si Jehova magaluwas kaniya gikan sa makalit-ag nga mga pukot (Sal 25:15; 31:4; 140:​5, 12) ug nga kadtong nagladlad sa maong mga pukot malit-agan mismo niana.​—Sal 9:15; 35:​7, 8; 57:6; 141:10.

Mahitungod sa pagkagama ug gamit sa nagkalainlaing mga pukot, tan-awa ang TIGLIT-AG UG LANGGAM; BALING; PAGPANGAYAM UG PAGPANGISDA.