NOB

Lagmit nga usa ka siyudad sa teritoryo sa Benjamin ug duol sa Jerusalem. Bisan tuod giduhaduhaan ang tukmang nahimutangan sa Nob, ang Nehemias 11:​31, 32 ug Isaias 10:28-32 nagpakita nga kini duol sa Anatot ug lagmit duol sa usa ka bungtod diin gikan niini makita sa usa ang Jerusalem. Gituohan sa pipila nga lagmit mao kini ang usa ka dapit duol sa Ras el Mushraf (Bukid sa Scopus), mga 1.5 km (1 mi) sa AS sa Patukoranan sa Templo didto sa Jerusalem. Kana magpasabot nga kini nahimutang nga A lamang sa Bukid sa mga Olibo.

Sa dihang mikalagiw si David gikan kang Saul, siya miadto sa Hataas nga Saserdoteng si Ahimelek nga nianang tungora didto sa Nob, ang “siyudad sa mga saserdote,” ug siya nakadawat gikan kang Ahimelek ug pipila ka pasundayag nga tinapay ingong pagkaon alang sa iyang mga tawo ug ingon man sa espada ni Goliat nga gitipigan didto. Tingali gibalhin ang tabernakulo ngadto sa Nob sa dihang ang Shilo nakaagom ug grabeng paghukom sa Diyos. (Itandi ang 1Sa 14:3; Sal 78:60; Jer 7:12-14.) Sa ulahi, giakusar ni Saul si Ahimelek nga nakigkunsabo batok kaniya, tungod kay siya mitabang kang David. Ubos sa sugo ni Saul, gipatay ni Doeg nga Edomhanon ang hataas nga saserdote ug ang 84 ka uban pang mga saserdote. Unya gipamatay ni Doeg ang mga lalaki, mga babaye, mga bata, ug ang mga hayop sa Nob. Si Abiatar lamang, ang anak nga lalaki ni Ahimelek, ang nakaikyas.​—1Sa 21:1-9; 22:6-23.

Ang Nob maoy usa sa mga dapit nga gihisgotan maylabot sa pagsulong sa mga Asiryanhon batok sa Jerusalem. (Isa 10:​24, 32) Gipuy-an kini pag-usab sa mga Benjaminhon human makabalik gikan sa pagkadestiyero sa Babilonya.​—Neh 11:​31, 32.