OTNIEL

Ang unang ginganlan nga maghuhukom sa Israel sunod kang Josue. Si Otniel maoy “anak nga lalaki ni Kenaz, manghod ni Caleb.” (Huk 1:13; 3:9; Jos 15:17) Bisan tuod kini nga gramatikanhong pagkahan-ay mahimong magpasabot nga si Otniel o si Kenaz maoy manghod ni Caleb, aron ipahiuyon sa ubang mga teksto angayng isipon si Otniel ingong pag-umangkon ni Caleb, ang anak ni Kenaz nga igsoon ni Caleb. Busa ang pipila ka hubad mabasa: “Si Otniel, ang anak nga lalaki sa manghod nga igsoon ni Caleb nga si Kenaz.” (AT, Mo) Dugang pa, si Caleb maoy “anak nga lalaki ni Jepune,” busa dili anak ni Kenaz sama kang Otniel.​—Num 32:12; 1Cr 4:15.

Ang kaminyoon ni Otniel kang Aksa nga anak nga babaye ni Caleb nahitabo tungod sa iyang kadaogan batok sa Canaanhong salipdanan sa Debir. Ang amahan ni Aksa nga si Caleb nagsaad kaniya ngadto sa mananaog sa siyudad. (Jos 15:16-19; Huk 1:11-15) Si Otniel may anak nga lalaki nga ginganlag Hatat ug mao ang gigikanan sa usa ka banay sa tribo ni Juda. Katuigan sa ulahi usa ka kaliwat ang gipili gikan niini nga banay aron mangulo sa usa ka pundok sa mga tig-alagad nga mikabat ug 24,000 panahon sa paghari ni David.​—1Cr 4:13; 27:​1, 15.

Ang unang pagpanglupig nga naagoman sa Israel gikan sa langyawng mga hari tungod sa ilang pagkadili-matinumanon milungtad ug walo ka tuig. Sa dihang sila “mituaw kang Jehova alang sa tabang,” Siya nagpatindog kang Otniel aron luwason sila. Tungod kay diha kaniya ang espiritu ni Jehova, gipildi ni Otniel si Cusan-risataim nga “hari sa Sirya,” ug human niana nahimo siyang katibuk-ang tagdumala ug usab naghatag ug hudisyal nga mga paghukom taliwala sa iyang mga igsoon.​—Huk 3:8-11.