ALAMO

[Heb., ʽara·vimʹ (plural)].

Ang Hebreohanong ngalan alang niining kahoya maoy katumbas sa Arabikong ngalan nga gharab, nga padayong gigamit alang sa alamo sa Euprates. Busa, bisan tuod ang alamo ug ang sause mao rang pamilyaha sa mga kahoy ug parehong komon sa Tungang Sidlakan, ang modernong mga leksikograpo mipabor sa kahoyng alamo (Populus euphratica) ingong hubad.​—Tan-awa ang Lexicon in Veteris Testamenti Libros ni Koehler ug Baumgartner, Leiden, 1958, p. 733; Hebrew and English Lexicon of the Old Testament ni Brown, Driver, ug Briggs, 1980, p. 788; The New Westminster Dictionary of the Bible, giedit ni H. Gehman, 1970, p. 998.

Ang kahoyng alamo komon kaayo ubay sa mga tampi sa Euprates (samtang ang sause nihit didto) ug maong mohaom kaayo sa gihisgotan sa Salmo 137:​1, 2, nga naghubit sa naghilak nga mga nadestiyerong Hudiyo nga nagbitay sa ilang mga alpa diha sa mga kahoyng alamo. Ang gagmay, tuskig, pormag-kasingkasing nga mga dahon sa alamo sa Euprates (gitawag usab nga aspen) gihawiran sa lagpad nga mga pungango ug nagbitay nga pahandag gikan sa lintunganayng lindog, ug tungod niini kini magtabyogtabyog bisan sa diyutay nga huyohoy, nga mahimong ikatandi sa emosyonal nga lihok sa mga tawo nga naghilak tungod sa kaguol.

Ang mga alamo sa Euprates makaplagan usab ubay sa mga tampi sa mga suba ug mga sapa sa Sirya ug Palestina, ug ilabina sa walog sa Suba sa Jordan. Didto, uban sa mga kahoyng tamarisko, kini sagad nga mahimong siot nga kakahoyan, samtang sa ubang mga dapit kini moabot sa gitas-ong gikan sa 9 hangtod sa 14 m (30 hangtod sa 45 p). Sa tanan nga paghisgot niini sa Kasulatan, kining mga kahoyng alamo gilangkit sa mga sapa o sa ‘bul-oganang mga walog.’ Kini gilakip sa mga kahoy nga ang mga sanga gigamit sa Pista sa mga Balongbalong (Lev 23:40); kini nagtaganag kasilongan sa gamhanang “Behemot” (hippopotamus) daplin sa suba (Job 40:​15, 22); ug ang kadaling moturok niini ubay sa dagayag-tubig nga mga dapit gigamit sa Isaias 44:​3, 4 sa paghubit sa kusog nga pagtubo ug pag-uswag tungod sa pagbubo ni Jehova sa iyang mga panalangin ug espiritu.