SAUSE

[Heb., tsaph·tsa·phahʹ].

Ang ngalan niining kahoya sa Hebreohanon maoy katumbas sa Arabikong safsaf, nga nagtumong sa kahoyng sause. Dunay duha ka matang sa sause nga makaplagan sa Israel; ang usa gitawag sa termino sa botaniya nga Salix alba, apan ang labing komon mao ang Salix acmophylla.

Ang Hebreohanong pulong makaplagan sa usa lamang ka higayon, sa Ezequiel 17:​5, diin ang simbolikong “binhi sa yuta,” nga dayag nga nagtumong kang Zedekias, sa mahulagwayong paagi gitanom sa hari sa Babilonya ingong “usa ka kahoyng sause sa daplin sa dakong katubigan.” Ang mga kahoyng sause makaplagan sa tampi sa mga suba ug sa mabaw nga mga sapa ug sa ubang umog nga mga dapit, diin kini daling manalingsing gikan sa mga pinutol nga sanga o mga turok ug kusog nga motubo. Kini dili gayod makatupong sa gitas-on sa mga kahoyng alamo apan motubo ingong gagmayng mga kahoy ug sagad mahimong mga kalibonan ubay sa kasapaan. Ang katahom niini makita diha sa yagpis, tag-as nga mga dahon niini, nga nagbitay gikan sa yagpis nga mga sanga niini nga nindot tan-awon.