REPAIM
Tag-as nga mga tawo o tribo. Dili tino ang kahulogan ug gigikanan niini nga ngalan. Lagmit, sila gitawag ug Repaim tungod kay sila maoy mga kaliwat sa usa ka tawo nga ginganlag Rapah. Sa 2 Samuel 21:16, mopatim-awng gigamit ang terminong ha·Ra·phahʹ (sa literal, ang Rapah) alang sa ngalan sa amahan aron sa paghawas sa tibuok rasa sa mga higante.
Mopatim-aw nga niadtong unang kapanahonan ang Repaim nagpuyo sa S sa Patayng Dagat. Ang mga Moabihanon nga nagpapahawa kanila nagtawag sa mga Repaim ingong Emim (“Makalilisang nga mga Butang”). Ang mga Ammonhanon nagtawag kanila nga Zamzumim (lagmit gikan sa lintunganayng pulong nga nagkahulogang “anaa sa hunahuna; laraw”). (Deu 2:10, 11, 19, 20) Sa dihang si Haring Kedorlaomer sa Elam miabot sa K aron makig-away sa lima ka rebelyosong mga hari duol sa Patayng Dagat (nga nagbihag kang Lot), iyang gipildi ang mga Repaim didto sa Asterot-karnaim. (Gen 14:1, 5) Kini nagpakita nga nianang panahona ang mga Repaim nagpuyo sa Basan, sa S sa Jordan. Wala madugay human niadto, ang Diyos miingon nga iyang ihatag sa mga kaliwat ni Abraham ang Yutang Saad, nga naglakip sa teritoryo nga gipuy-an sa mga Repaim.—Gen 15:18-20.
Kapin sa 400 ka tuig sa ulahi, sa hapit nang mosulod ang Israel sa Canaan, ang “yuta sa mga Repaim” gituohan gihapon nga mao ang yuta sa Basan. Didto sa maong dapit gipildi sa mga Israelinhon si Og nga hari sa Basan (Deu 3:3, 11, 13; Jos 12:4; 13:12), kinsa mao na lamang “ang nahibilin sa mga nabilin sa Repaim.” Dili matino kon kini ba nagpasabot nga siya mao ang kataposang hari sa Repaim o nga siya mao na lamang ang nahibilin sa mga Repaim nianang dapita, kay ang mga Repaim sa wala madugay nakaplagan didto sa K sa Jordan.
Didto sa Yutang Saad nagkaproblema ang mga Israelinhon sa mga Repaim, kay ang pipila kanila nagpabilin didto sa kalasangan sa bukirong rehiyon sa Epraim. Ang mga anak ni Jose nahadlok sa pag-abog kanila. (Jos 17:14-18) Sa dihang si David nakig-away sa mga Filistehanon, siya ug ang iyang mga alagad nakapatay ug upat ka tawo nga “nangatawo sa mga Repaim sa Gat.” Ang usa kanila gihubit ingong “usa ka tawo nga talagsaon ka dako kansang mga tudlo sa kamot ug sa tiil tagun-om, kawhaag-upat.” Ang pagkahubit sa ilang mga hinagiban nagpakita nga silang tanan maoy tag-as kaayo nga mga tawo. Ang usa kanila mao si “Lami nga igsoong lalaki ni Goliat nga Gitihanon.” (1Cr 20:4-8) Kini nga Goliat nga gipatay ni David maoy unom ka maniko ug usa ka dangaw (2.9 m; 9.5 p) ang gitas-on. (1Sa 17:4-7) Ang asoy sa 2 Samuel 21:16-22 mabasa nga “Goliat,” inay nga “igsoong lalaki ni Goliat,” sama sa 1 Cronicas 20:5, nga nagpakita nga tingali dihay duha ka Goliat.—Tan-awa ang GOLIAT.
Ang Hebreohanong pulong nga repha·ʼimʹ gigamit sa Bibliya sa lain pang diwa. Usahay kini tatawng nagtumong, dili ngadto sa usa ka espesipikong mga tawo, kondili ngadto sa mga patay. Sa paglangkit niini nga pulong sa usa ka lintunganayng pulong nga nagkahulogang “pagkahulog, pagpahulay,” ang pipila ka eskolar mihinapos nga kini nagkahulogang “pagkaunlod, mga walay gahom.” Diha sa mga teksto nga may ingon niini nga diwa, ang Bag-ong Kalibotang Hubad naghubad niini nga “kadtong walay gahom sa kamatayon,” ug ang daghang uban pa nga mga hubad naghubad niini nga “mga patayng butang,” “namatay,” ug “patay.”—Job 26:5; Sal 88:10; Pr 2:18; 9:18; 21:16; Isa 14:9; 26:14, 19.