REPAIM, UBOS NGA PATAG SA

Usa ka dakong patag o walog duol sa Jerusalem. Lagmit kini nakabaton niining ngalana tungod sa tag-as nga mga tawo nga ginganlag Repaim nga kanhi namuyo didto. Kini gitala ingong utlanan tali sa mga teritoryo sa Juda ug Benjamin. (Jos 15:​1, 8; 18:​11, 16) Sa amihanang tumoy niini may usa ka bukid o tagaytay nga nag-atubang sa Walog sa Hinnom. Ang Ubos nga Patag sa Repaim gituohang mao ang patag sa Baqaʽ dapit sa HK sa Patukoranan sa Templo. Kini midulhog ug mga 1.5 km (1 mi) ug dayon mihiktin paingon sa Wadi el Werd (Nahal Refaʼim).

Nagustohan kini sa mga Filistehanon tungod sa pagkatabunok sa patag (Isa 17:5) ug sa pagkaduol niini sa Jerusalem ug Betlehem. (2Sa 23:​13, 14; 1Cr 11:15-19) Human dihogi si David ingong hari sa Israel, ang mga Filistehanon mihimog mga pagsulong sa Ubos nga Patag sa Repaim. Apan si David misunod sa pagtultol sa Diyos ug nagmadaogon batok kanila.​—2Sa 5:17-25; 1Cr 14:8-17; tan-awa ang BAAL-PERAZIM.