TIMON, II

Usa ka hinungdanong bahin sa mga kagamitan sa paggiya sa usa ka barko. Ang karaang mga sakayan adunay nagkalainlaing mga estilo ug gidaghanon sa mga timon. Ang pipila adunay usa ra ka bugsay nga panimon. Apan, sagad ang mga barko sa Gresya ug Roma adunay duha ka bugsay nga panimon diha sa ulin, nga ang matag usa lagmit mahimong gamiton nga tinagsatagsa pinaagi sa usa ka gaoran. Kon magpondo ang sakayan, ang mga bugsay nga panimon iisa gikan sa tubig pinaagi sa paggakot niini.

Ang “mga bugsay nga panimon” (“mga bugsay nga panggiya,” NE) gigamit sa paggiya sa sakayan nga gisakyan ni Pablo sa pagpaingon sa Roma apan kini nga sakayan naguba didto sa Malta. Ang mga angkla gipamutol, ug sa wala pa iisa ang pangunahang layag, ilang gilugakan ang mga higot, nga tungod niana sayon rang nagiyahan sa mga tripulante ang sakayan ngadto sa baybayon pinaagi sa mga bugsay nga panimon.​—Buh 27:40.

Si Santiago (3:​4, 5) nagpakita sa dakong puwersa sa dila sa pagkontrolar sa direksiyon sa tibuok lawas pinaagi sa pagtandi niini ngadto sa usa ka gamayng timon (“bugsay nga panimon,” Int) sa usa ka dakong barko.