MAHUMOT NGA KAHOY

Lakip sa mahalong mga butang nga gidala sa mga magpapatigayon ngadto sa simbolikong “Dakong Babilonya” mao ang mga butang nga hinimo gikan sa “mahumot nga kahoy,” o sa kahoy nga “thyine.” (Pin 17:5; 18:​11, 12, ftn sa Rbi8) Kini nga kahoy, nga lagmit naggikan sa A nga Aprika, gipabilhan sa karaang mga Romano sa paghimo ug mahalon kaayong muwebles. Ang kinamahalan nga kahoy mao ang ubos nga bahin sa punoan, tungod sa nagkalainlaing grano ug sa lapad nga mga tabla nga makuha gikan niini. Ang kahoy humot, gahi, ug mosinaw pag-ayo; ug tungod sa nagbalodbalod o nagliyoliyo nga mga linya sa grano, ang ubang mga lamesa nga gama niini gitawag ug “mga lamesang tigre” o “mga lamesang panther.” Taliwala sa mga Grego kining humot nga kahoy gigamit sa pagsimba diha sa ilang templo, ug ang ngalan niini naggikan sa Gregong termino alang sa paghimog mga halad-nga-sinunog.

Gituohan nga ang kahoy nga gigikanan niining mahumot nga kahoy mao ang kahoyng sandarac (Tetraclinis articulata), usa ka kahoy nga pamilya sa aguho nga lumad sa A nga Aprika ug kapamilya sa sipres, ug moabot sa gitas-ong 4.5 hangtod sa 7.5 m (15 hangtod sa 25 p). Ang bulok sa kahoy niini lubos pulahon-kape ug kini pinog grano.